No.2515/2021-2022
Dated Aizawl, the 7th October, 2021: PM CARES Fund sum hmanga 250 Litres per Minute PSA Oxygen Plant, Serchhip District Hospitala bun thar chu vawiin khan Honourable Prime Minister, Pu Narendra Modi chuan ram chhunga hmun thlan bik danga mite nen a rualin internet kaltlangin a hawng a. Serchhip Hospital tual atangin Health Minister Dr. R. Lalthangliana hovin he hun hi lo zawm ve a ni.

Prime Minister in zing dar 11:00 am a a hawnna hun a neih hma deuhvin Serchhipah hian PSA Oxygen Plant thar hawnna pual inkhawm tawi lo buatsaih hmasak a ni a. He hunah hian Dr. R. Lalthangliana chuan PSA khawl thar dahna hmun chu hawngin a fangkual a, chumi hnuah inkhawm tawi buatsaih zui a ni.

He hunah hian Minister chuan, kan hriat theuh angin tun hnaiah hripuiin min chim a, hriselna lama hmanrua leh thawktu kan mamawhna a pung nasa hle a. Hmanrua leh khawl pawimawhte hi lam hla tak atanga phurh thlen ngaite an ni thin a, a bunna turah mamawh dang tam tak a lo tul thin nen; chawpchilh leh rang taka thil kal pui a har chang a awm a, hei hi mipuiten min hriatpui a tul hle a ni. Sawrkar hmalakna anih vang ngawtin thawklehkhatah thil a tih fel rum rum theih vek bik lova, hun kan mamawh thin a ni, a ti. Dr. R. Lalthangliana chuan, sawrkarin hri dona kawnga hma a lakna te chu hripui len lai leh a reh hnu pawha kan ramin khuarei thlenga a tangkaipui tur a tam hle tih a sawi a. District tina RtPCR dah turte leh vawiina Serchhip leh District danga hawn mek Oxygen khawlte leh hmalakna dangte chu hripui a reh hnuah pawh an tangkai chhunzawm hle zel dawn tih a tarlang a ni. Minister chuan, PM Cares Fund atanga din district hrang hrang leh ZMC leh Cancer Hospital, a vaiin khawl thar 14 zingah Prime Minister zahawm takin Serchhip Hospital ami a hawn atana a rawn thlang chat mai chu ropui a tih thu a sawi a, Serchhip tan ni chhinchhiah tlak leh ni danglam bik a ni a, ka lawmpui hle cheu ni, a ti. Vawiina Mizoram hmun hrang hranga PSA Oxygen Plant hawn thar 14 te Oxygen siam theih belhkhawm chu 6550 Litres per Minute (lpm) zet a nih thu a tarlang bawk. Hripui len hnuah ZMC ah damlo Khum nasa taka tihpun a ni tawh a, ICU 13 chauh awm thin pawh 34 ah tihpun niin, Aizawl Civil Hospital ICU pawh nasa taka tihlen niin kuminah la tihlen belh leh tum a ni a, heng kan ICU te hi tunlai khawl thar tha ber berte nena thuam an ni. Mizoram sawrkarin Health Infrastructure tihhmasawnna lama hma a lakna te chu a lian hlawm hle a. World Bank atangin Rs. 280 crore kan hmu a, chu chuan Mizoram Health Infrastructure Strengthening kan thawk chho tan mek a, Japan International Funding Agency atangin Rs. 500 crores hmu lehin chu chuan Cancer Superspeciality Hospital kan din leh bawk dawn a ni. Heng sum kan hmuh theih nan hian sawrkar laipui leh sum min petute nen hun rei tak kan indawr tawha, tunah a lo fel ta. A taka thawh tan mek niin hnate zo fel thlap tur hian hun engemawchen kan mamawh leh dawn a ni. Thil tha neia khuarei daih hmasawnna nei turin mipuiten dawhthei taka kan nghah a tul thin a ni, tiin hriselna lama hmalakna tlangpui tarlangin thawklehkhata thawh zawh mai theih a nih loh dante a sawifiah a ni.

He hun hi Dr. Lalnunhlima Khiangte, DMS charge la mektuin a kaihruaia. Covid19 hripui len hma chuan Serchhip District Hospital hian Oxygen hi a burin Aizawl lama mi an phur mai thin a, thla khatah vawi thumte an kal thin tih a sawi a. Hripui len hnuah 80 Litres per Minute bun a nia, chu chuan nasa takin a chhawk a, vawiinah 250 Litres per Minute hawn a ni ta hian kan mamawhte min phuhruk that hle kan beisei a, kan lawm hle a ni, a ti. Vawiina hawn tak 250lpm PSA Plant chu a khawl 19th September, 2021 ah a rawn thlenga, chumi thla vek ni 25 ah hman theihin kan inbun fel thei ta mai a. Kan bun fel ran theih nan hian bawrhsap Pu Kumar Abhishek leh P&E lama thawktute an hah hle a, kan lawm hle a ni. A bun zo fel hmasa kan nih avang hian PM Office hian vawiina virtual-a a hawn zinga tel turin min rawn thlang anih te pawh kan ring a ni, tiin hma an lak dan tlangpui a sawifiah a ni.

He hunah hian bawrhsap Pu Kumar Abhishek, IAS chuan lawmthu sawiin a khar a. Prime Minister virtual Programme chu zawm zui nghal a ni.

Prime Minister virtual inauguration neih a nih zawh hian Dr. R. Lalthangliana chuan Serchhip Bazar building tihzauhna hnathawh (extension) a tlawh leh a ni. Minister hi Pu R. Lalramnghaka, Secretary, Health & Family Welfare leh Pi T. Lalhmangaihi, Director, DHME ten an rawn zui a, Serchhipa Health & Family Welfare a thawktute leh sawm bik officer leh media mi thenkhatte an tel a ni