1131/2026-2027

Dated Aizawl, the 23rd June, 2026: Vawiin khan Dawrpui Multipurpose Centre-ah UD&PA Department buatsaih ‘SVANidhi Mahotsav’ (Khawlaia thil zuarte puala kut) chu Aizawl Mayor Pu H. Lalremtluanga'n a hmanpui.

Pu H. Lalremtluanga chuan kut hman mekah chuan hmeichhia an tam chu lawmawm a ti a, an thawhrimna, tumruhna leh tlawm duh lohna te chu chhuanawm a tih thu a sawi. Mahni sum hmang ngawta sumdawn a harsatzia sawiin, PM SVANidhi Scheme hnuaia loan hmanga sumdawnna an kalpui thei chu lawmawm a tih thu a sawi a, an loan lakte an rulh that chuan an CIBIL Score a lo tha ang a, tun aia loan tha zawk dil kawngah pawh a puih theih tur thu a sawi.

Mayor chuan AMC sawkar thar hnuaiah vendor te leh vending zone zirchiang turin study team an in din thu te, vending registration pek chhuah chungchangah hmasawnna tur an ngaihtuah mek thu te, thutna hmun sawn te leh thutna hmun tur neilo te chungchangah pawh ngaihtuahna an sen mek thu te leh thutna awm sa chei that kawngah leh mipuite tana dawr nuam theih tur zawka siam kawngah hma lak zel an tum thu a sawi. Sawrkar laipuiin Solid Waste Management Rules 2026 a ti chhuak thar a, bawlhhlawh paih leh sawngbawl kawngah tun aia tha leh uluk zawka hma lak an tum thu a sawi bawk. Mayor chuan khawlaia thil zuarte chu beidawng lova rim taka thawk a, mahni awmna hmun ngai renga awm mai lova hma sawn tum zel turin a fuih a ni.

Pu Jacob Lalawmpuia, PM SVANidhi State Mission Director leh UD&PA Director ni bawk chuan kalkhawm te chu chibai a buk a, PM SVANidhi Scheme hi Covid 19 vanga khawlai a thil zuarte’n an eizawnna a harsatna an tawh phuhrukna tur a Scheme chu siam anih thusawiin, loan leh hamthatna dang an dawn theihna tur atana scheme a ni. Mizoramah PM SVANidhi beneficiaries 4459 lai awm tawh in, he Scheme hi AMC huam chhungah kalpui mek niin Lungleiah leh Mizoram hmun danga la kalpui zel tura hmachhawp an neih thu a sawi. Street vendors te economy hi kan ram economy siamtu te zinga mi a ni, a ti a, AMC sawkar thar chu UD&PA nen thawhhona tha an neih ngei a beisei thu a sawi bawk.

He kutah hian PM SVANidhi credit card semna hun neih a ni a, loan vawi hnihna thleng rul zo tawhte tan dil theih a ni a, mi 42 te’n dil tawhin vawiin hian Pi Saitluangi hnenah hlan a ni. He kutah vek hian PM SVANidhi scheme kal tlanga loan rul tha leh digital payment ti tam zual pali (4) te hnenah lawmman certificate leh sum fai hlan an ni. A dawngtute chu:

1. Pi Hunlawmawmi
2. Pi Chawngthanpari
3. ⁠Pi R.Lalawmpuii
4. ⁠Pu Biakliana
5. ⁠Pu Vanlalhriatzuala Sailo

He kutah hian AMC Executive Councillor pahnih Pu Vanlalhruaia leh Pu Vanlalfaka te leh he scheme hnuaia bank lama an thawhpui te pawh an tel a. Pi C. Lalduhzuali, PM-SVANidhi Project Director leh UD&PA Joint Director ni bawk chuan report a pe a, Pi R. Lalhmangaihzuali, Superintendent chuan lawmthu sawinain session hmasa zawk hi a khar a, session pahnihnaah hian loan la tute leh bank lam te nen sawihona leh PM SVANidhi credit card chungchang leh cyber awareness lam inzirtirna hun hman a ni.

PM-SVANidhi Scheme chungchang tawi :

PM-SVANidhi Scheme hi Street Vendors ten an eizawnnaa hmasawnna an neih theihna tura scheme duan niin, Kum 2020, June ni 1 ah sawrkar laipuiin a tlangzarh a, Ministry of Housing & Urban Affairs leh Ministry of Department of Financial Services te chu Nodal niin, Mizoram ah chuan UD&PA Dept chu Nodal Department a ni.

He scheme hian a tum ber chu Street Vendor ten an eizawnna pui tura Loan awlsam zawka an lak theihna tur leh, pung tlem zawka an rulh theihna tur te, him zawk a an sumdawnna an kal pui theihna tur a phone hmanga sum dawn leh pekchhuah thiam tir a hman tir hi a tum pakhat a ni. Loan la tu zawng zawng te, anmahni bakah an chhungte Social Security scheme hrang hrang chhawr tangkai tir a tum bawk a ni.

He scheme hnuaiah hian Loan lak theih hi Rs. 90,000/- thleng niin, Loan hi Instalment ang in hetiang hian pek tur a ni:-

1st Loan - Rs. 15,000 ( thla 12 chhunga rulh zawh tur)

2nd Loan - Rs. 25,000 ( thla 18 chhunga rulh zawh tur)

3rd Loan - Rs. 50,000 (kum 3 chhunga rulh zawh tur)

Loan hi a pung atanga 7% sawrkarin a rulh pui tur a ni a, maherawhchu rul tha lo te chu rulh pui theih an ni dawnlo a ni.
PM SVANidhi scheme hnuaia Loan pek chhuah dan:-

Mizoram
1st Loan - 2,914 beneficiaries (Rs. 3.05cr)
2nd Loan - 1,172 beneficiaries (Rs.2.51 cr)
3rd Loan - 373 beneficiaries ( Rs.1.87cr)

Aizawl
1st Loan - 2,108 beneficiaries (Rs. 2.22 cr)
2nd Loan - 951 beneficiaries (Rs.2.03 cr)
3rd Loan - 326 beneficiaries ( Rs.1.63cr)

He scheme hnuaiah hian Loan application hi online (portal kaltlangin) upload tur a ni a, District hrang hrangah UD&PA Department lamin Application upload in, Lending Institution hrang hrang ten loan hi an pe chhuak a ni.

Aizawl bikah hian Scheme kal pui tan tirh atangin UD&PA leh AMC ten Street Vendors Loan la tur leh la tawh te hi buaipuiin, Camp pawh vawi 65 buatsaih a ni tawh a, loan la tawh te hi Ministry in a phut angin Vendor ID card (mobile vendor) leh Certificate of Vending(CoV) te siam sak thin niin, heng ID Card leh CoV te hi Aizawl bikah chuan AMC atanga pek chhuah a ni.

He scheme hnuai Loan la tute chu anmahni leh an chhungteah Socio Economic Profiling neih niin, Social Security Scheme hrang hrang heng- PM Suraksha Bima Yojana, PM Jeevan Jyoti Bima Yojana, PM Shram Yogi Maandhan Yojana, PM Jan Dhan Yojana, One Nation One Ration Card, Registration under BoCW, Janani Suraksha Yojana, PM Matru Vandana Yojana te hi an chhawr tangkai theihna tura puih an ni.

PM-SVAnidhi Scheme leh a scheme hnuaia beneficiaries te hi sawrkar laipuiin Prime Minister Office (PMO) atangin a en zui (monitor) a, Scheme hnuaia beneficiaries te tan hian Exposure Program te neih thin a ni a,heng hunah te hian SVANidhi beneficiaries te hi hruai thin an ni. PM-SVANidhi Scheme kum thum tlin lawmna, June ni 1, 2023 a Delhi-a neih tumin SVANidhi beneficiaries te hruai an lo ni tawh a, kum 2024 leh 2026-ah te Republic Day lawmna pui ber Delhi-a neihah beneficiaries leh an kawppui te hruai tawh niin, tun thla ni 1 ah khan Scheme kum 6 tlin lawmna North East State te puala neihna hmun, Agartala ah Beneficiaries te hruai an ni leh bawk ani.