1132/2026-2027

Dated Aizawl, the 23rd June 2026: Vawiin khan Disaster Management & Rehabililtation (DM&R) Minister Prof. Lalnilawma chuan ‘Disaster Risk Reduction  and Resilience Building Capacity of North East India’ initiative kalpui mek zulzuiin ‘Disaster Risk Reduction in Mizoram’ tih thupui hmangin official-te nen a pisaah sawihona hun an hmang.

DM&R Minister chuan Mizoramah ruahtui a tlak tam avangin leimin leh tuilian a nasa nasat thin a; chuvangin, mipuiten harsatna nasa zawk an pumpelh theihna turin lei laih dan te, insak dan leh lei vung paih danahte fimkhur a ngai, a ti a. Ram changkang zawkte tihdan entawna, an hmalak tawh dante zirchianna neih a ni chu lawmawm a tih thu leh heng atanga Mizoramin kan zir ve theih apiang chu kalpui dan kawng zawn a tulzia a sawi bawk.

Disaster Risk Reduction and Resilience Building Capacity of North East India hi National Disaster Management Authority (NDMA), JICA, IIT-Guwahati leh North East State te thawh hona hnuaia kalpui mek a ni a. ⁠Hemi hnuaiah hian North-East State atangin Japan ramah training tura state hrang hrang official-te tirh an ni a, Mizoram aiawhin DM&R Dept Joint Director (OP) Pu.Francis Lallawmkima chu a kal a ni.

Training-ah hian khuarel chhiatna laka lo inven dan mai bakah lirnghing leh leimin/ lei tawlh kaihhnawih a lo thlen thulh pawha inrinlawk dan tur te, lirnghing leh leimin lo thlen pawha chet lak dan tur chungchang an  zir a ni.

Vawiin ⁠sawihonaah hian Pu.Francis Lallawmkima chuan Japan rama khuarel chhiatna a lo thlen thulha an lo inhmakhua dante, an hmachhawn dante leh an chet lak dan hrang hrang mai bakah Mizorama kalpui ve theih dan tur Power Point Presentation hmangin a sawifiah bawk.

He hunah hian DM&R Department Commissioner & Secretary Pu Udit Prakash Rai leh Department official hrang hrangte an tel a ni.