1133/2026-2027 

Siaha the 23rd June 2026: Mara Autonomous District Council (MADC ) a Local Administration Department (LAD) buatsaihin vawiin khan MADC Golden Jubilee Hall, Siaha-ah RGSA Scheme kaltlangin District chhunga VC 71 te hnenah computer set semna hun hman a ni. MADC CEM Pu M Laikaw, District Bawrhsap Pu VL Hruaizela Khiangte leh EM i/c LAD, MADC Pu K Chhuabei ten thusawina an nei.

CEM Pu M Laikaw chuan VC 71 te hnenah computer set sem theih tura duhsakna a chantir avangin RD&AD changtu Minister Prof Lalnilawma chungah lawmthu a sawi a, computer age ah computer neilo VC tam tak an awm tiin vawiina sem tak computer te chu VC leh Khawtlang tan hmasawnna ropui tak a nih ngei a beisei thu a sawi. Prime Minister in a ngaihpawimawh em em ‘Digital India’ tihhlawhtlinna pakhat a ni tiin Sawrkar Laipui leh State sawrkar chungah lawmthu a sawi bawk.

Pu M Laikaw chuan Siaha District mipuite chu ngaihtuahna thar nei tura a duh thu a sawi a, Sawrkar in hmasawnna ruhrel a duan hrang hrangte neitu thinlung pu a, duat tak leh dimdawi taka enkawl a pawimawh a ti. Vawiina sem tak computer set chu VC ten mipui rawng an bawlna kawngah an mahni tanpuitu pawimawh tak a nih a beisei tiin an kuta mawhphurhna tla chu tha taka hlen chhuak ngei turin duhsakna a hlan a ni.

Pu K Chhuabei, EM LAD chuan kalkhawmte chungah lawmthu sawiin  RGSA kaltlangin VC house te, tour te bakah computer set sem a ni thin a ti a, Siaha ah pawh an term chhungin VC house engemawzat sak a ni tawh tiin Central leh State Sawrkar chungah lawmthu a sawi.

LAD changtu EM chuan computer sem tak te chu hlawkthlak taka hman a nih theih nan Siaha District chhunga VC te tan computer training buatsaih a nih tur thu tarlang nghalin uluk leh ngunthluk taka chhim turin a chah nghal a. Tun tuma la dawng ve lo VC te pawhin an dawn ngei theih nan theihtawp chhuah a tum thu a sawi bawk.

Thu sawitu dang District Bawrhsap Pu VL Hruaizela Khiangte chuan India in zalenna a hmuh atanga a kum za naa Ram hmasawn (Developed Country) nih a tumna, Vikshit Bharat 2047 hlawhtlinna chu grassroot level ah a innghat a, hmasawnna rualkhai leh tluantling a awm theihna turin VC te chu engkimah theihtawp chhuah tura chahin thawhhopuiah a sawm. ECI in kum 20 dana a buatsaih Special Intensive Revision chungchang pawh sawilangin official te leh kohhran, Khawtlang leh NGO te tanhona vangin enumeration form digitisation-ah Siaha District chu a zo hmasa pawl a ni a, claims and objections hunah mahni hming endik theuhin, democracy rama kan dikna chanvo humhalh a nih theih nan leh e roll dik leh felfai a awm theih nan theihtawp chhuah a tul a ti. Vawiin a sem tak computer set te chu a hmanna tur dik taka hman a nih theih nan leh Khawtlang leh District tan hmasawnna a thlen ngei theih nan duhsakna a hlan nghal bawk .

Rashtriya Gram Swaraj Abhiyan (RGSA) hi Ministry of Panchayati Raj, Govt. of India hnuaia scheme a ni a. Mizoram-ah RD&D Department in a kalpui a ni . RGSA thiltum ber chu VC te thuam chak a, training pek a, hmasawnna ruhrel tha zawk siam sak a ni.

Pi S Lalmuanpuii, Sr LAO, MADC chuan he hun hi kaihruaiin keynote address sawina a nei a, Rev F Vanlaldika, Moderator elect chuan hunserh hmangin Pu Henry PL Hnaihly, LAO MADC in vote of thanks sawiin hun tawp a khar.