Vawiin khan Aizawl Municipal Corporation (AMC) a Mayor hmasa ber ni turin Ward no 8 atanga thlan tlin Pu PC Lalhmingthanga chu rinawmna thu tiam tir a lakluh a nih a. A rual hian Deputy Mayor Pu Lalringliana, Ward no 2 atanga thlan tlin leh Councillor dangten BOC Meeting Hall, AMC Office ah Aizawl DC Pu Franklin Laltinkhuma kaihhruaiin rinawmna thu tiam tir a lakluh an ni.

AMC Mayor atan Pu PC Lalhmingthanga hi Ward no.3 Councillor Pu K. Romawia chuan rawtin, Ward no. 11 Councillor Pu H.Zonunsanga chuan he rawtna hi a thlawp a. Ward no 10 Councillor Pu R.Lalbiakthanga chuan AMC Deputy Mayor atan Pu Lalringliana chu rawtin Ward no 12 Councillor Pu R.Thanglura’n a thlawp a ni.

AMC Mayor hmasa ber Pu PC Lalhmingthanga hian thusawiin Mayor atana thlangtute chungah lawmthu a sawi a. AMC hmasa in mipuite chhawr tangkai theih tur hma a lo lak tawh chu chhunzawm an tum thu leh hmasawnna atana hnathawk tura mipuiin an chungah rinna an nghah chu an ti thlawn dawn lo tih a sawi a. Mipui huapzo sawrkar an din tur thu leh an manifesto a an tar lante tihhlawhtlin ngei an tum thu a sawi bawk.

Aizawl DC Pu Franklin Laltinkhuma pawhin tluang tak leh tha taka mipui tana hna thawk turin AMC sawrkar thar chu duhsakna a hlan a. An sum hnar ber chu mipui atanga chhiah (tax) an khawn a ni a, hei hi mipui sum a nih avangin fimkhur leh dik taka hmang turin a ngen a ni.