Aizawl Municipal Ward-III (Ramhlun North, Ramhlun Venglai, Ramhlun Vengthar, Ramhlun Sports Complex & Laipuitlang) chuan vawiin khan Ramhlun Community Hall-ah Public Consultation Meeting an nei a, Pu Nghaklianmawia, CEO-in meeting hi kaihruaiin Ward-III Councillor Pu Lalthanliana’n kalkhawmte lawmna thu a sawi a ni. Public Meeting-ah hian AMC Chairman Pu C.T.Zakhuma chuan AMC din tirh atanga vawiin thlenga hmasawnna an neih kawng hrang hrang leh an hmachhawp zel tur thil pawimawh hrang hrang te a tarlang a. Principal Secretary, UD&PA Pu R.L. Rinawma’n AMC hmalakna tur pawimawh tak pakhat ‘Property Profile and Service Level Survey’ chungchang mipuite a hrilh bawk a ni.

Mizoram Municipalities Act, 2007 dan hmangin Aizawl-ah June 2008-ah khan AMC chu din tan a ni a, chuta tang chuan Aizawl khawpui chu Municipal kalphung chuan a lo awm tan ta a. Aizawl khawpui chhung hi tun hma chuan veng hrang hrangah Village Council 76 inrelbawlna hran leh mawhphurhna hrang theuh an nei thin a. Aizawl-ah khawpui inruahmanna (Urban Planning) leh leilung hman dan kalhmang pawh tun hma chuan a mumal lo hle a, hei vang hian khawpui chhungah harsatna a thlen phah thei thin a ni. Hetiang harsatna tikiang turin Mizoram sorkar chuan 74th Constituitonal Amendment Act, 1992 dan tlawhchhanin Sorkar Laipui phalnain AMC inthlanna hmasa ber chu November ni 3, 2010-ah hlawhtling taka neih a ni. Chuta thlanchhuahte chuan an mawhphurhna leh chanvo chu November ni 16, 2010 atang khan an chelh tan ta a ni.

Mizoram sorkar leh AMC te chuan JNNURM ruahmanna anga thil ti turin a inbuatsaih chho a, chu chu 13th Finance Commission duhdan ang leh Asian Development Bank atanga Loan lak inremna ziak ang a ni a. Chuta thil pawimawh tak pahnih mamawh te chu :- 1) Thlalem thlalak (satellite image) hmanga Municipal huam chhunga Property (chenna in te, sumdawnna in te, zirna in te, etc.) zawng zawng fiah fai taka tarlanna record siam leh, 2) AMC Area-a tui connection neih dan te, tui chhe paihna kal dan te, tui luan kawr kal dan te leh bawlhhlawh paihna hmun te chu Map hmanga a dinhmun diktak (level) dah te a ni.

Heng pahnih tihhlawhtlin a nih ngei theih nan Asian Development Bank chuan hnathawhna tur sum leh mithiam rual - Institutional Consultancy (IDC) - chu Mizoram sorkar leh AMC chu a rawn pe ta a ni.

IDC-te chuan Aizawl Municipal Area-a in leh lo zawng zawng 100% chu a mal te tea zirchiang turin hma a la tan mek a. Hetah hian chipchiar takin In neitu, a chhunga cheng, In pianhmang leh awmdan leh hman a nih dan zawng zawngte, In tinah lutin an zirchiang dawn a. In leh In luah chin ram chu mumal takin an teh chhuak vek dawn bawk a ni.

Profile Survey hian a huam tur chu - tui connection, PHED Consumer No., LSC No., House No., Trade Licence No.(AMC/UD&PA in a pek) leh thil dang hriat tur pawimawh dangte a ni a. Property (In) zawng zawng fiah fai taka tarlanna record leh tui luankawr leh tuichhe paihna leh tui connection kal dan chungchang te Map siamin a nihna ang tak a lang thei dawn a ni.

He Profile Survey hian AMC chu nasa takin a pui theih beisei a ni. He Survey hian chiang taka a tarlan tum ber chu :- (a) Sorkar In - Raj Bhawan, Sorkar building State Minister-te chenna atana ruahman te, Sorkar Laipui enkawl office building te, Mizoram Government building te, Police Station, Sorkar buatsaih bazaar te, Sorkar ram zawng zawng leh thil dang sorkar ta zawng zawng (b) Pathian Biakna atana hman In te (church, temple, mosque, etc.) (c) Hospital te, Community Hall te, Indoor Stadium leh Field/Playground (d) Zirna In atana hman te (school, college, university, club) (e) Sumdawnna a hman In te (dawr, bazaar, shopping mall, bank leh office) (f) In sak dan chi hrang hrang (kuccha, semi-pucca, pucca) sak tawh leh sak mek te.

Survey neih dan tur IDC-in kalpui a duh dan te chu a hnuaia mi ang hi a ni :- IDC chuan AMC nena Survey tan dan tur an sawiho ang a, Ward tinah mipui rawnna hun (Public Consultation Meeting) neiin Sorkar, AMC, Ward Council, Local Council, NGO, Citizen Group aiawh theuh te chu meeting-ah hian tel tura beisei an ni. IDC chuan Aizawl khawchhunga cheng mipa emaw hmeichhia emaw Surveyor leh Supervisor tur a ruat ang a, anni hian Veng tinah zing dar 7:00AM - 2:00PM inkarah In tinah lutin zawhna an zawt ang a, In neitu/luahtu te chuan zawhna hrang hrang te hi a fiahfai thei ang bera chhan tur a ni ang. Survey nei hmasa ber team-te hian minute 30 atanga 45 hun hman beisei a ni a, Supervisor pawhin endikna hun atan minute 15 vel hman rin a ni. Chuvangin, AMC chuan he Survey neihna turah hian mipuite tawiawmna leh thlawpna a mamawh a, Aizawl khawpuiin hmasawnna a neih ngei theih nan mi zawng zawng tawiawmna a ngen tak meuh meuh a ni.

Vawiin Aizawl Ward-III Public Consultation Meeting-ah hian Property Tax chungchang pawh zir ho a ni a, tun atanga reiloteah chuan Property Tax hi AMC tan sum lakluhna hnar pui ber tur a ni.