Vawiin khan Kolasib District Advisory Committee, Nehru Yuva Kendra chu an chairman Pi Niharika Rai, IAS, DC hovin a office chamber-ah an thukhawm a. Kum 2012-2013 chhunga Action Plan thlir hovin sum ruahman te thalaite hmasawn nana hman dan tur an sawi ho.

Chairman Pi Niharika Rai chuan NYK hnuaia Youth Club dingte tana hamthatna hrang hrangte chu Kolasib District chhunga khaw tinin hria se, Youth Club hi uar taka din nise, chu chu anmahni hmasawnna liau liau a nih thu a sawi a. Hemi atana pawisa dahte chu a bo a bang awm lova hman tangkai a tul a tih thu sawiin tlawmngai pawl YMA te chu Club din nan hian an pawimawh hle dawn a ni, a ti.

Pu Raj Kumar Joshi, Secretary, Nehru Yuva Kendra, Kolasib chuan Action Plan duan chhuah te pharhin member te chu an ngaihdan te zau taka sawi turin a sawm a. Kolasib-ah Youth Club an hnuaia in register anla awm rihloh thu pawh sawiin hei hi tithuai tura tan lak nise a ti a. Tuna NYK Volunteers awm mek mi pathum te leh YMA te nena tangtlangin Club din tur hian hmalak nghal nise tiin Committee chuan a rel a. Chu chu Firms & Societies-ah in register leh pawl hminga bank account hawng an ni tur a ni a.

NYK hnuaia hamthatna awm thei ang angte an hmuh theih nan hengte hi tih ngei a ngai a. Nakinah Club Award pawh siam a ni dawn a ni NYK District Advisory Committee thukhawm chuan kum khat chhunga tihtur hrang hrang an duante zingah Hmeichhiate tana thiamthil engemaw a training pek te, harsatna sutkian dan tur chungchanga a mamawh group te hnena training pek te, Block level Cultural Festival neih dan tur te, Ni ropui lawm chungchang leh Youth Award pek dan tur te an tel a ni.