1131/2024-2025

Aizawl, July ni 10, 2024: State Election Commission, Mizoram thuchhuak angin Aizawl Municipal Area huam chhunga Ward No. VI (Councillor ni lai boral vanga seat pakhat ruak) chu a hnawhkhah nan Bye-Election neih tur a ni a. Draft Electoral Rolls chu vawiin khan Aizawl DC Conference Hall ah DC Er. Lalhriatpuia chuan a tlangzarh a ni.

Hemi inthlanna atana hman tur AMC Electoral Rolls Summary Revision, 2024 chu tehfungah date 01.07.2024 hmangin neih a ni dawn a. Ni 01.07.2024 a kum 18 tling chin te Roll ah hian an chuang thei dawn a ni. AMC Ward No. VI Bye-Election neih hun tur chu State Election Commission, Mizoram in a hranpa in hriattirna a la tichhuak leh ang.

1) Aizawl Municipal Area huam chhunga Ward No. VI Electoral Rolls vawiina tlangzarh a nih atang hian 18.07.2024 thleng Electoral Roll atanga paih, thun thar, siamthat ngai leh insawn duhte tan dilna (claims and objections) chu LLO hnenah thehluhna hun hawn a ni ang.

2) Ni 10.07.2024 - 18.07.2024 chhunga dilna lut chu 19.07.2024 - 26.07.2024 chhungin MERO/AMERO ten an endik ang a. Hetianga an enfiah zawh hnu hian MERO-ten thutlukna an siam fel hnuah hming thunluh ngai, paih ngai leh siamthat ngaite chu thliar hran leh a ni ang a, hemi hnu hian Data entry (Computer-a thunluh hna) thawh zui nghal a ni ang a, Final Roll hi ni 31.07.2024 ah tarchhuah a ni ang.

3) Tun tum Draft AMC Electoral Rolls-a Elector awmzat chu a vaiin 9846 (mipa 4594 leh hmeichhia 5252) an ni. AMC Ward VI hian Chanmari West, Edenthar leh Hunthar te huamin, Polling station 10 a awm a ni.

4) MERO atan Pi C. Lalduhzuali, SDO (S), Aizawl District (8413058436) leh AMERO atan Dr. Lalchamliani, SDC, Aizawl District (9536500259) te ruat an ni.

5) AMC E/Roll hi MLA Roll nen a hranpa a buatsaih a ni a, hemi a inthun thar, insawn (transfer) leh siamthat (correct) te hi MLA Roll atan a rin nghal theih loh a ni.

Aizawl DC chuan Summary Revision of AMC Ward No. VI Electoral Rolls, 2024 chu tluang tak leh hlawhtling taka neih theih nan bialtu MERO, AMERO leh LLO te, Local Council, Political Parties, tlawmngai pawl hrang hrangte leh Media te hma min lakpui tur leh tawiawmna a sawm a ni.