1132/2024-2025

2024 Vawkhniakzawn thla ni 10: Vawiin khan Saikuti Hall, Lungleiah a ni hnihna atan 'Awareness Campaign on Traffic Rules & Non-Communicable Diseases (NCD)' hun hman niin, Lungleia Two Wheeler Taxi leh Four Wheeler Taxi khalhtute chu traffic dan leh natna inkai chhawn theih loh chi chungchang zirtir an nih bakah, an hriselna dinhmun endiksak an ni.

Lunglei Two Wheeler Taxi Association President Pu Lalngurliana Kawlni kaihhruaia hun hmanah hian Pu James Miahlung, Additional Deputy Commissioner & Chairman, Sub-Committee on NCD Awareness Campaign & Screening Drive, Lunglei chuan thu sawiin, Healthy Lunglei District Campaign, DTO leh Traffic lam te nen Lungleia Two Wheeler Taxi leh Four Wheeler Taxi te puala NCD leh traffic chungchang inhrilh hriatna neih ni se tih rel a nih angin he hun hi buatsaih a ni tih a sawi a. Mizoramah NCD natna hrang hrang - cancer, zunthlum, thisen sang, stroke, adt. vei kan pung chakin, thihpui pawh kan tam hle tih sawiin, ngaihven ngun a ṭul hle a ni, a ti a. Ni tin nunphungah hriselna ngaih pawimawh te, taksa inenkawl uluk leh ei leh in chungchanga fimkhur te chu NCD laka him nan a pawimawh hle tih sawiin, taxi khalhtu kal khawmte chu an hriselna ngai pawimawh tur leh traffic rules te ṭha taka zawm ṭhin turin a chah a ni.

He hunah hian Lunglei District Transport Officer Pu Beitlotha Nohro chuan inlawmna thu sawiin, taxi khalhtute chu Lunglei hmel timawitu emaw, Lunglei hmel tibaltu emaw an ni thei tih vawng reng tur te, Lunglei khawpuiin traffic lama hma a sawn theih nan traffic rules te zawm a, mipuite himna ngaihven chunga lirthei khalh tur leh danin a phal baka chak a tlan lo tur te'n a chah a. Mahni stand te fai tak leh thianghlim taka enkawl turin a chah bawk.

Vawiin hun hmannaah hian Lunglei Civil Hospital-a Medical Officer Dr C. Lalhlimpuii chuan NCD chungchang zirtirin, natna hrang hrang zingah natna inkai chhawn theih loh vei hi India ramah 63% vel awmin, thihna thlentu lian ber a ni, a ti a. A tam zawk chu ruihhlo leh zuk leh hmuam tih ṭhin vang a nih thu sawiin, he'ngah hian fimkhur a ngaih thu leh ei leh in uluk a, taksa sawizawi ṭhin a pawimawh thu a sawi.

Pu Lalṭhabuanga, Traffic incharge, Lunglei Police Station chuan Traffic Rules chungchang zirtirin, lirthei khalhtute tana zamw tur dan hrang hrang leh dan bawhchhiate  hremnna pek theih dan te a tar lang a. Zawhna leh chhanna hun hman a ni bawk.

Vawiina awareness campaign buatsaihah hian Two Wheeler Taxi leh Four Wheeler Taxi khalhtu mi 150 chuang telin, Civil Hospital, Lungleia thawktute'n an hriselna dinhmun te an endiksak nghal a. Nimin lamah khan auto rickshaw khalhtute tan awareness campaign leh hriselna endikna (NCD screening) hi buatsaih a lo ni tawh bawk a ni.