1394/2024-2025

Aizawl, 31.07.2024: State Election Commission, Mizoram thuchhuak angin Aizawl Municipal Area huam chhunga Ward No. VI (Councillor ni lai thihna avanga seat pakhat ruak) chu a hnawhkhah nan By-Election neih tur a ni a. Hemi inthlanna atana hman tur Final Electoral Rolls chu vawiin khan Aizawl DC Er. Lalhriatpuia chuan a tlangzarh a ni.

AMC Electoral Rolls Summary Revision, 2024 ah hian tehfungah 01.07.2024 hmangin neih a ni, ni 10.07.2024 - 18.07.2024 chhunga dilna lut chu ni 19.07.2024 - 26.07.2024 chhung khan MERO/AMERO ten an endik a. Hetianga an enfiah zawh hnu hian MERO-te'n thutlukna an siam fel hnuah hming thunluh ngai, paih ngai leh siamthat ngaite chu thliar hran leh a ni a. Hemi hnu hian Data entry (Computer-a thunluh hna) thawh zui nghal char char a ni. AMC Ward No. VI By-Election neih hun tur chu State Election Commission, Mizoram in a hranpa in hriattirna a la tichhuak leh dawn a ni.

Aizawl DC chuan Summary Revision of AMC Ward No. VI Electoral Rolls, 2024 chu tluang tak leh hlawhtling taka kan neih theih chhan chu bialtu MERO, AMERO leh LLO te, Local Council, Political Parties, tlawmngai pawl hrang hrangte leh Media te tawiawmna leh thawh hona avang a ni tiin an chungah lawmthu a sawi a. Inthlan neih a nih hunah pawh tluang taka kalpui a nih theih nan thawhhona tha tak nei turin a sawm bawk a ni.

Tun tum Final AMC Electoral Rolls-ah hian Elector 9901 (mipa 4601, hmeichhia 5300) an awm a. Electoral Roll revise a nih hnu hian hming 71 thun belh a nih laiin chhan hrang hrang avangin mi 16 hming paih a ni thung a, Draft Electoral Roll atanga a punna chu 55 a ni. Ward No. VI huamchungah hian Chanmari West, Edenthar leh Hunthar te a tel a ni.

AMC Roll hi MLA Roll nen a hranpa a buatsaih a ni a, hemi a inthun thar, insawn (transfer) leh siamthat (correct) te hi MLA Roll atan a rin nghal theih loh a ni.