1395/2024-2025

2024 Vawkhniahzawn thla ni 31: District Animal Husbandry & Veterinary Officer (DAH&VO) office, Lunglei aṭanga report dawn a nih danin tunlaiin Lunglei District, a bik takin Lunglei khawpui, LMC area huam chhungah sawrkar laipui Department of Animal Husbandry & Dairying hnuaia Expert Committee-in ui kawlh chi, mihring tana hlauhawm khap ṭul a tih vulh an awm nual nia hriat a ni a. He'ng ui hlauhawm chite hian mihring bakah ran dang te pawh sehin, ṭhenawm khawvengte tan harsatna an lo thlen tawh ṭhin tih hriat niin, he'ng ui hlauhawm chite hi a vulhtute'n inthlah puntir a, mi dang hnena an hralh chhawn bakah, tualchhung ui nen inthlah pawlhtir (cross-breed) a ni bawk a, hei vang hian Lunglei District-ah ui kawlh chi an pung chak hle niin report dawn a ni bawk a.

Lunglei khawpui enkawltu, tualchhung sawrkar Lunglei Municipal Council (LMC)-in ui khuahkhirhna tur dan a duan mek chu hman theiha peih fel a la ni rih lo va; ui khuahkhirhna dan hman tur mumal a awm rih loh laiin a rang lamin he'ng ui hlauhawm chite hi a vulh leh inthlah puntir chungchangah khuakhirhna thupek chhuah vat a ṭul si avangin, vawiin, July ni 31, 2024 (Nilaini) khan Lunglei District Magistrate Pu R. Lalṭhazuala chuan Section 163, Bharatiya Nagarik Suraksha Sanhita (BNSS) tlawh chhanin Lunglei District mipuite zawm turin a hnuaia mi ang hian khapna thupek a chhuah a ni:

"1. Lunglei District huam chhungah he'ng a hnuaia tar lan ui chi hrang hrang sawrkar laipui Department of Animal Husbandry & Dairying hnuaia Expert Committee-in ui kawlh, mihring tana hlauhawm nia a ngaihte lak luh emaw, vulh emaw, hralh emaw, inthlah puntir emaw khap tlat a ni.

a) American Pitbull Terrier
b) Dogo Argentino
c) American Bull Dog
d) Mastiffs (Boerbulls)
e) Rottweiler
f) Wolf dogs
g) Bandog
h) Tosa Inu
i) American Staffordshire Terrier
j) Fila Brasileira
k) Boerboel
l) Kangal
m) Central Asian Shepherd Dog (Ovcharka)
n) Caucasian Shepherd Dog (Ovcharka)
o) South Russian Shepherd Dog (Ovcharka)
p) Tornjak
q) Sarplaninac
r) Japanese Tosa & Akita
s) Rhodesian Ridgeback
t) Canario Akbash dog
u) Moscow Guard dog
v) Cane corso

"2. A chunga tar lan ui hlauhawm chi vulh mekte chuan an ui vulhin chi an thlah theih loh nan Veterinary Hospital-ah emaw, private clinic-ah emaw an uite a chhul/til an laktir ngei ngei tur a ni.

"He thupek hian chhuah a nih aṭanga ni 60 (sawm ruk) chhung a huam ang a, thupek zawm lote chu section 223, Bharatiya Nyaya Sanhita (BNS) hnuaiah hrem theih an ni."

Attachment

  • Loading attachment...