1697/2024-2025

Aizawl, 22.08.2024: Vawiin khan Aizawl Municipal Corporation hnuaia Ward VI atan Corporator thlanna By-Election buatsaih chu tluang taka kalpui a ni a. AMC Ward VI ah hian vote tla percentage chu 47.38% a ni.

AMC Ward VI hian Chanmari West, Edenthar leh Hunthar a huam a. Polling Station 10 awmin vote nei hi 9901 (mipa 4601, hmeichhia 5300) an awm a. Vote hi 4691 (mipa 2170, hmeichhia 2521) a tla a ni. Returning Officer leh Asst. Returning Officer te'n polling station te hi an tlawh kual bawk a ni.

He inthlannaah hian Candidate pathum - Chawnghmingthanga (BJP), H. Lalremtluanga (Zoram People's Movement) leh Lalrinfeli (Independent) an awm a. AMC Ward VI Corporator ni lai boral avanga seat ruak hnawhkhat tura By-Election hi buatsaih a ni.