1698/2024-2025

Dated Serchhip, the 22^nd August, 2024: Vawiin khan Serchhip Bawrhsap Pu Paul L.Khuma, Competent Authority for Land Acquisition (CALA) ni bawk chuan Bungtlang, Keitum leh Sailiam Kawn te tlawhin National Highway kawngpuiin a paltlang hmunhma a fang a. Mimal leh pawlin harsatna an neih te bakah tun hnai ruahsur nasa avanga hnathawh khaihlak te leh harsatna thleng te a hmunah a enpui a ni. 

DC Pu Paul L.Khuma hi SDC Dr C. Vanlalchhanhimi’n a tawiawm a. National highway kawngpui zauh hna enkawltu National Highway Infrastructure Development Limited (NHIDCL) hotute leh Contractor te bakah khawtlang hruaituten lo dawngsawngin, an hna thawh tawh chin dinhmun leh harsatna an neih te, an thawh chhunzawm dan tur ruahmanna te an lo hrilhfiah a ni.

NH-54 kawng siam meka Serchhip District chhung Bungtlang, Keitum leh Serchhip Sailiam Kawn inkarah kawng siam la zawhfel lohna hmun 13 te DC chuan a tlawhchhuak a. Kawng siam hi zawhfel thuai thuai a nih theih nan chak taka hmalak a nih mek laiin kawng siamna dala in lo la awm te, a then te chu zangnadawmna la tawh chung si a in lo sa leh te, a then te chuan anmahni in kawta waiting shed sak rem ti lo te an awm a. DC leh amah tawiawmtute hian heng chhungkua te hi anmahni chenna in ngeiah dawrin an harsatna tawh dan te an sawipui a. Buaina leh harsatna awm lo a,  hun tiam chhunga thiat turin a hriattir a. Sawrkar tha chakna hmanga tihluihnaa nawrchhiat sak ngai lo a, hun an pek belh chhunga thiah ngai ang ang te thiat fel turin DC chuan a ngen a ni. 

DC kaihhruaina hnuaiah NH-54 zauh leh chei that hna thawk tu NHIDCL te leh an hnuaia contractor KRAM Infracon. te nen karleh hian review meeting neih tur niin an hmalak dan te leh hmachhawp te sawiho a ni leh dawn a. District Administration hian NH54 chungchangah meeting tum tak tak a lo ko tawh thin a, Serchhip District mipui te hamthatna tur ngaihtuahin Contractor te tih tur bituk a lo pe fo tawh thin a. Serchhip DC Pu Paul L.Khuma chuan heng hmun te a tlawhnaah hian NHIDCL ten tha taka an tih tur an lo tih avang leh hna an thawh that avanga lawmawm a tih thu a sawi a ni.