All Mizoram Farmers Union (AMFU) buatsaih, ‘ Disbursement of Subsidy under Spices Board of India for the Cultivators of Ginger, Lakkadong Turmeric, Large Cardamom for 2009 ’ vawiina I & PR Auditorium a neih chu Chief Minister Pu Lal Thanhawla chuan a hmanpui.

 

 

Chief Minister chuan kuthnathawktu ten phur taka hna an thawh zel theih nana sum puihbawmna pek an ni chu a lawmpui thu a sawi a. Chhiat an tawh avanga a programme dang zawng a thulh laia, he hun erawh pawimawh a tih vang leh a tel chak avanga rawn tel anih thu a sawi hmasa a. Chief Minister chuan AMFU hmalakna te chu tha a tih thu sawiin, Sorkar policy lian ber NLUP nen tum thuhmun an neih avangin, hma a hruai zawk chang pawh a awm ang a ti a. Sorkar ang chuan an hun hmasaah pawh NLUP chu a hlawhtling a, tunah pawh hian kum 5 chhung atan Cheng vaibelchhe 2500 central-in min pawmpui sak avangin sorkar ang chuan kan hlawhtling der tawh a ni a ti. Kumin chhung atan pawh Cheng vaibelchhe 300 thleng min pek an duh chungin, keimahni lam zawkin kan hmang zo hman lovang tih kan hlauh vangin kan phak tawk awm turah kan duh tawk rih a ni a ti a. Tunah chuan NLUP nuihzat thin tute khan min phurpui tawhin, min nawr min nawr tawh zawk a, a lawmawm hle a ni a ti.

Chief Minister chuan Bangladesn nen MOU ziah chungchang sawiin, ramdang nena han insumdawn tawn tur chuan Mizo ten tam kan tih hi midangte tan chuan tam anih ve thin loh avangin nasa taka tan kan lak a ngaih tur thu a sawi a. Hetah hian AMFU chu hmahruai turin sorkarin a beisei dawn a ni a ti. Pu Hawla chuan lakhuihthei kan neih chi hi tam tak ching tur leh sawngbawl theih turin Global Link Incorporated (USA) nen an inbiak mek thu sawiin, kum khatah quintal nuai 45 vel mamawh anih tur thu a sawi a. Sapthei ah pawh an phur hle a ni a ti a. Union Ministry of Food Processing-in Mega Food Park siam nana Cheng Vaibelchhe 65 min dah that sak thu sawilangin, a tihpuitlin nan leh Company lian dangte (Multinational Company - MNC) nen thawk chho tur chuan inkalpawhna kawng kan mamawh tur thu a sawi a. Kolodyne Multi National Transport Project puitlin hunah phei chuan kuthnathawktute tharchhuah thiar zung zung anih theih nan Lawngtlai thleng Rel tlan tir a tul tur thu a sawilang bawk a. Heng zawng zawng hi kuthnathawktute chhawr ber tur ala ni ang tiin, tunah hian Sairang thleng rel luh tir phawt anih tur thu a sawi a ni.

Pu Lal Thanhawla chuan kumin October thla atang khian NLUP hna (activities) thenkhat chu hman theih a beisei thu sawiin, rilru kaihhruaina (Motivation) neihte pawh ala tul ang a ti a. A dawngtu ten an hlawhtlin ngei theihna turin taimakna, dikna, rinawmna leh thianghlimna nen an thawh a ngai dawn a ni a ti.

AMFU President Pu R.Lalduhawma pawhin thu sawiin, AMFU thil tum leh sorkar policy bulpui ber NLUP te chu tum inang nei an nih avangin an inhmeh hle a ni a ti a. Sorkarin thil tha min rawn tihsak turah hian rinawmna, taimakna leh dikna nen kan thawhchhoh a pawimawh ang tiin, sorkar chuan a tih tur dik takin a rawn ti dawn a, a bak chu keini farmers te kutah a awm dawn a ni tih hi i hre thar vek ang u a ti a ni.

Vawiina  Spice Board of India kaltlanga subsidy an sem hi sawhthing, aieng leh elaichi chingtu chhungkaw 607 te hnenah pek an ni a. Kumtin chhung tin hnenah hectare 1 a chingtute hnenah Rs.12,500/- anga pek an ni a. Amaherawhchu huan an neih zauh zawng a inan loh avangin .4 hectare anga chhutsaka pek an ni. Huan hi kum 5 chhung an kalpui chuan organic tawh tura ngaih a ni bawk. Vawiina subsidy an sem zawng zawng hi Rs.26,57,560 /- a ni a. Chung zinga sawhthing chingtute hi khaw 7 atangin chhungkua 320 an ni a, aieng hi khaw 18 atangin chhungkua 192 leh elaichi hi khaw 3 atangin chhungkua 95 te an ni.

Inkhawm hi AMFU Sr.Vice President Pu Lalhlawhliana’n a kaihruai a, memberte hall a lenglo khawpin an kal tha a ni.