Vawiin khan Lunglei RTP Cinema Hall (Main DOJO) Bazar Veng Lunglei ah All Mizoram Karate Association Lunglei District buatsaihin Black belt leh Brown Belt Ceremonial function neih a ni.
Pu Saihnuna Sailo President AMKA Lunglei District in inkhawm kaihruai a. Pu K Lalawmpuia LDSC Chairman chuan thusawiin Lunglei District AMKA chuan mahni inpekna,thuawina leh AMKA hruaitu tha in neih avangin hmasawnna thatak in nei a, Lunglei District pawh inti hmingtha hle ani. Lunglei District chauh ni loin Mizoram bakah National, International thlenga inelna a hming chher turin Karateka te a chah.
Pu R.Malsawmtluanga Secretary AMKA Lunglei District chuan report pe in Lunglei District AMKA hi kum 1998 atanga bul tan chho in kum 2002 ah AMKA General Headquarter zawm ani a. Karate ah hian naupang ho an tui a player chherchhuahah pawh hma an sawn hle ani,ati. Nikum khan RMSA hnuaiah selfdefence(Mahni inven dan) for girls sikul pariatah zirtirna pek an ni a, kumin ah school 76 ah class -9 leh class-10 te tan self defence for girls te tan martial arts zirtir an ni leh dawn a ni. Ni 29.3.2014 a Ramhlun Indoor stadium ah Black belt leh Brown belt exam tha tak a chhuak Karateka 12 an tel ani.
