Vawiin hian Lawngtlai District Election Office Conference Hall-ah Member of District Council pathum Bye- Election neihna a hman tur Draft Roll tlangzarh a ni a. He Draft Roll atan hian State Election Commission thu pek angin kumin January ni 1 a tlangzarh tak Summary Revision of Electoral Roll chu hman a ni.

Lai Autonomous District Council member nilai pahnih 10- lawngtlai Bazar MDC Constituency atanga thlan tlin Pu C. Ngunlianchunga, tuna MLA/Minister ni ta hmun ruak leh Pu JH Lallianngura, 24- Tuithumhnar MDC Constituency atanga thlan tlin, nikum November thlaa boral ta te hmun ruak hnawhkhat tur leh, Chakma Autonomous District Council Area a 2- Borapansury MDC Constituency atanga thlan tlin Dr. Buddha Dhan Chakma, tuna MLA/ Minister ni ta te hmun ruak hnawhkhahna tura Bye- Election neih turah Mizoram State Election Commission chuan Dt 14.4.2014 khan Roll Revision chungchang hriattirna chhuah in vawiin hi Draft Roll tlangzarh ni turin a ruat a. Hemi bawh zui hian Draft Roll hi tlangzarh a ni ta a ni.

Vawiin a Dratf Roll tlangzarhna ah hian District Council pahnih huam chhunga Political Party hrang hrangte sawm niin Roll Revision neihna a thil pawimawh tur hrang hrangte sawi ho nghal a ni bawk.

Secretary, Mizoram State Election Commission thuchhuahin a tar lan danin Draft Roll ah hian sawisel duh leh zawh chian duh neite tan naktuk Dt 23.4.2014 atanga 26.4.2014 thleng hun hawn a ni anga, Dt 28.4.2014 atanga 1.5.2014 inkarah paih ngai leh siam that ngaite siam an ni anga, Dt 2.5.2014 atanga 8.5.2014 inkarah Roll a thun tharte leh siamthat awm apiangte tarchhuah theih tura buaipui a nih hnuah Dt 9.5.2014 ah Final Roll tlangzarh tur a ni.

MDC pathum Bye-Election neih turah hian Polling Station 13 awm in Draft Roll in a tarlan danin vote nei thei mihring 5555 an awm a, an zinga mi 2856 hi hmeichhia niin mi 2699 hi mipa an ni thung.

Vawiina Draft Roll tlangzarhna a lo kal khawm Political Party hrang hrang hruaitute chu District Election Officer Pu J. Hmingthanmawia chuan Electoral Roll siam thar mekah Party te chu dik leh rinawm taka an mite zirtir tura chahin, foreigner vote it lo tur leh khua leh tui dik takte vote hmanga tlin tum theuh turin a fuih a. ERO/AERO ten thun thar ngai leh paih ngaite an zawng leh dawn a tute mahin thil diklo ti tura lo ngen emaw lo thlem emaw lo turin a ngen a ni.

Vawiin chawhnu lam hian he Bye- Election a Officer mawhphurhna nei chinten training an nei nghal a ni.