Chanmari Football Club chuan Mizo zinga I-League khel thei club nih ngei tumin I-League project a siam a, he project tlangzarhna hun hi vawiin khan I&PR Auditorium ah hman a ni. Minister Pu Lal Thanzara, MFA President ni bawk chuan logo pawtpharhin Chanmari FC I-League Project a tlangzarh a ni.

Aizawl North III bialtu MLA Pu Lal Thanzara chuan Mizoram in tunhnaia football-ah hlawhtlinna nasa tak a chhar chho zel chu lawmawm a tih thu a sawi a. Ram pum huap State hrang hrangte football inelna sang ber Santosh Trophy ah hial Mizoram team an champion thei chu ropui tiin Football Club hruaitute, ruhrel dintu sorkar, players-te leh football ngaina tu mi thahnemngaite thawhrimna rah a ni, a ti. Minister chuan Chanmari FC in India rama football club-te inelna sang ber I-League khel tur a hma a la chu fakin Pathian ringa theihtawp chhuaha an beih phawt chuan hlawhtlinna an chan ngei a beisei thu a sawi a ni.

Tlangzarhna hun hi CFC President Pu R. Lalhmachhuana'n a kaihruai a, project secretary Pu Andrew Lalremkima'n club report tlangpui a pe a. MFA Honorary Secretary Pu Lalnghinglova Hmar in fuihna thuchah sawi a. Coach Pu H. Vanlalthlanga chuan Indian football a Mizote hmabak chu I-League club neih a ni a, Chanmari FC in an khelh ngei theihna tura theihtawp a chhuah tur thu a sawi bawk.