Sawrkar Laipui chuan Atal Mission for Rejuvenation and Urban Transformation (AMRUT) duang chhuakin, he ruahmanna hian a tum ber chu khawpuia chengte khawsak alo awlsam a, khawpui hrisel leh changkang zawk siam ani. AMRUT chuan a hmasa berin khawpui a cheng mipuiten tui thianghlim herh haw mai theih an nei ngei tur ani a ti a, ek leh thli te thianghlim taka sawngbawl tur a ni a tih bakah tui hawk luan kawr tha te pollution siam lo mipui veivahna him leh tha (Non Motorised Transport) in tawllenna hmun park leh green spaces te, naupangte intih hlimna hmun nuam siam te a ngai pawimawh em a em a ni. 

AMRUT hnuaiah hian kum khat chhunga tih tura ruat khawpui chawikan hnathawh (project) chi hrang hrangte hi state annual plan pakhatah khaikhawm niin heng ruahmanna siam te hi sawrkar laipuia Urban Development Minister chuan kumtin endikin a pawmsak hnuah state tin ten project sanction leh approval te hi an pe zui tawh thin a ni. 

Mizoram ah chuan UD&PA Department-in khawpui hmasawnna project hrang hrang state annual plan tha tak siam chhuakin hna chak taka thawh zui a ni. Aizawl tui supply na pipe line hlui tawh tak tak te siam that hna cheng vbch 20 dawn lai man chu chak taka thawh mek ani. Aizawl khawpui tuia chawm tu pakhat Greater Aizawl Water Supply Scheme Phase I hi November 1988 atanga hman tan ani a, AMRUT hnuaiah pumping main a thar a thlak vek tur a ni. Filter house pawh siam that a ni a, duty room leh WT room zawng zawng a thara sak that leh vek niin nitina tui pump thin pawh litre nuai 80 velah a chhoh thuai beisei a ni. 

AMRUT hnuaiah hian Septic Tank tha tawk lo leh soak pit mumal loh vanga rimchhia tih reh tuma hmalak niin DRDO Scientist te hmuh chhuah Bio Digester Technology chu hman tangkai a anih thuai theihnan chak takin hmalak mek a ni. 

Aizawlah hian tuihawk luankawr a la that mumal loh avangin kum tin furah harsatna nasa tak kan tawk thin a, in leh lo tam takte a chhiain, nunna hialte kan chan phah thin. Chumi pumpelh nan tui hawk luankawr leh road side drain siamna tur project Cheng vaibelchhe 57 man siam a ni a. Tunah hian Cheng nuai 238.9 man thawh zawh tawh a ni a, a bak hi pawisa thlen leh huna thawh zawm tura ruahmansa vek a ni.