Vawiin Chawhma dar 11:00 khan Agriculture Department bultumin Champhai District Agriculture Office Conference Hall-ah NEDP hnuaia Purunsen chin dan kut hnathawktute hnenah training pek a ni. 

Pu James Vanlalluaia, DAO, Champhai chuan Purunsen chingtute chu  mahni thiam intih ngawt a tawk lova hlawk zawka Purunsen thar chhuak tur chuan a zir chhuak mithiamte rawn chungin a nihna tur ang taka kan sawngbawl hi pawimawh em em a ni, a ti a. Purunsen chingtu kalkhawmte  chu training uluk taka ngaithlaa midangte zirtir theitu ni thei turin a chah a. 

 Purunsen man a to zel a vangin purunsen chin chu eizawnna tling a ni a, hlawhtling taka thar chhuah anih chuan a hlawknate chu a chingtute ta vek tur a ni a, Department chuan kut hnathawktute hlawhtlin theihna tura puih bak tih theih a nei lova a hlawhtlinna chu an kutah a awm reng a ni tih hriain rinawm tak leh taima taka hna thawk thin turin a chah a. Sawrkar atanga tanpuina an dawnte a nihna ang taka hmang turin a chah nghal bawk a ni. 

NEDP hnuaia purunsen chin hi Agriculture Department in a kalpui niin Champhai District-ah hian hmun hrang hrang Acres 55 a zauah ching turin inbuatsaihna kalpui mek a ni a. Purunsen chi hi pek chhuah tawh niin vawiin training-ah hian a chin dan bakah a chingtute puihna tur awm thei angte kut hnathawktute hrilhhriat  an ni. 

Pi Malsawmkimi Scientist KVK, Khawzawl in power point hmangin purunsen chin dan leh a enkawl zui dan training a pe a, Pu Dajiet Lalthlamuana BTM (ATMA) Champhai Block hnen atangin tanpuina an dawn tur leh an hman dan tur ngaihthlak a ni a, Pu Lalmalsawma Khawlhring,BTM(ATMA) Khawbung Block hnen atangin Quality improvement leh a dah that dan ngaihthlak a ni bawk. Hemi hnu hian sawihona leh zawhna chhanna hun hman a ni. 

Training hi Pu H Lalkima AEO Champhai in kaihhruai a. Pu James Vanlalluaia DAO, Champhai chuan kalkhawmte lawmna thu a sawi a Pi Lalrindiki, AEO, Champhaiin lawmthu sawina in hun a khar a ni.