Vawiin chawhma khan Health & Family Welfare, PWD leh I&PR enkawltu Minister Pu  Lal Thanzara chuan Khawzawl Electric Veng YMA Hall thar cheng nuai sawmli (40 lakhs) senga sak hawnna chu khuallian niin a hmanpui a. Hall thar hawnna a nei nghal a ni. He hunah hian Pu Thanglianzaua chu khualzawhawm a ni.  

Hawnna inkhawmah thu sawiin khuallian chuan Khawzawl Electric vengin YMA, khawtlang hruaitu leh veng chhung mipuite thawhhona zara  Hall tha leh changtlung tak a nei thar chu thinlung takin a lawmpui thu a sawi a. Khawpui leh zokhuaahte rualkhai zawka hmasawnna a lo awm theih nan sawrkarin theihtawp a chhhuah a; inkalpawhna, tui thianghlim in tur, hriselna, zirna tha leh eizawnna siam sak hi sawrkar ngaih pawimawh zual a ni, a ti a. Mizo hnam chu pawl lian tak tak pathum Kohhran, Sawrkar leh YMA-te phuarkhawm anih thu tarlangin mizote chu kohhran vawn nei vek, sawrkar pawh mitin huapzo nei a ni a, sawrkar siam that kawngah  mitin ten mawhphurhna kan nei vek a ni, a ti a. YMA chu ramri kham hnan ve loh Missionary, kohhran hruaitu, Pastor leh mi thahnemngai tena June ni 15, 1935-a an  din kha a ni tiin a danglamna tak chu chhiahhlawh anga mipuite tana nunga rawngbawltu a nihna hi a ni, a ti a. Kohhran tih a tana remlo YMA in hma a lak thin thu sawiin Kohhran, Sawrkar leh YMA-te hi lungthu pathum an tang kawp apianga mipuite malsawmna ni thin an ni, a ti a. 

YMA chu khawtlang tana nu leh pa nih tlin chhiatni thatni a tawiawmtu, thlei bik neilo anih thu leh mahni hmasial leh hamthatna buaipui reng chungin YMA member tha tak anih theih loh a ni, a ti a. Ram leh hnam humhalh, ruihhlo dona leh eirukna dona kawngah te YMA, Kohhran leh Sawrkar chu tanho zel a ngaih thu leh ruihhlo, drugs-in kan ram min chenchilh reng avangin a do letna kawngah kohhran, YMA leh sawrkarte thapui thawha nasa zawka tan rual angai a ni, a ti a. Awareness  Campaign, Sensitization leh workshop-te bakah hian a taka thawk chhuaka ke  pen chhuah  a hun tawh tak zet thu a sawi a.  Rilru fim tak puin a tha ber tur ngaihtuah chung zelin hma lak a ngai a ni, a ti a. Khuallian chuan Electric veng mipui ten an harsatna leh mamawh a hnena an thlente chu hma lo laksak a tum thu a sawi a. Khawzawl damdawiin a Doctor in daih lohnate pawh lo enzui sak a tum thu leh Damdawi In eng tha tak pek a nih tur thu leh Damdawi In tual zawlah High-Mast bun a nih tur thu a sawi bawk a.  Damdawi In sak thar pawh kumin Krismas hma ngeia peih fel hman anih tur thu bakah Khawzawl Dinthar Veng YMA Hall pavement pawh siam anih theih nana hmalak anih tur thu a sawi a ni. 

Minister chuan Electric Veng mipuite chu YMA Hall thar chu neitu thinlung pua, a enkawl, vawnfai leh venhim kawngah pawh theihtawp chhuah turin a chah a. Dim dawi leh uluk taka hmang tangkai thin turin a chah nghal a ni.

Khawzawl ElectriC Veng YMA Hall-hi Power & Electricity ram sah thlak atanga sak a ni a. Hall leh a chheh vel cheibawlna atana sum hman zawng zawng hi avaiin cheng nuai 49.73 a ni a. Sum hmuhna te chu BADP, MP LADS Fund, MLA Fund, UD&PA, RRRLP leh 14^thFinance Commission atang ten a ni a. Hall sak hna hi January ni 7, 2010 khan thawh tan a ni a. Building lenzawng hi a dung feet 93, a vang feet 40 leh a san zawng feet 22 niin a hmun awh zau zawng hi Cubic feet 81,840 a ni a. Hall hi mizo pa chhiara chhawng hnih niin choka, bungraw dahna, meeting hall leh bathroom-te a awm nghal a ni. 

Hall thar hawnna inkhawm hi Pu Lalsanglura Hnamte, President, Electric Veng Branch YMA-in a kaihruaia. Pu Lorrain Vanlalbela, Secretary Electric Veng Branch YMA–in Technical report a pe a. Pu Lathawmmawia’n  lawmna thu  sawiin Pu B. Lalremmuana’n hun tawpna a siam a ni. Programme hlimawm tak tak mal zai, recitation , hnam lamte ngaihthlaka entir a ni a. Tlai lamah Hall thar lawmna ruai theh a ni. 

Nizan lamah Hall thar lawmna urlawk zan hman niin H&FW Dept. lam atangin awareness campaign neih a ni a. Zanin lamah pawh intihhlimna leh hruaitu hluite chawimawina neih a ni ang. Khawzawl Electric Veng Branch YMA hi August ni 2, 2003-a din a ni.