Vawiin khan General Administration Department Principal Secretary Pi Renu Sharma-i hovin a office chamber-ah Mizorama Cable TV analogue signal hmanga pek chhuah digital signal-a leh hna kalpui meka hmasawn dan leh harsatna awmte sawi ho a ni a, chak zawka hma lak theih dan tur ngaihtuah a ni.
Hetah hian sawrkar laipuiin digital signal-a inleh kim hun tura a tuk (dateline) bawhpelh a nih dan leh a chhan hrang hrangte tarlan a ni a. Harsatna lian ber chu Cable TV operator-te’n an duh khawp Set Top Box supply an la hmuh theih loh vang a nih thu tarlan a ni. Phase-III huanga Mizoram khawpui 23-ah December ni 31, 2015 kha dateline a nih laiin, tun thlengin a zatve (50%) pawh zawh a la ni lo va. Phase-IV huanga a bak zawng thingtlang khuate tan December ni 31, 2016 hi dateline ni thungin, hemi hunah erawh hi chuan Mizoram pumah digital TV hi kalpui hman vek tura hma lak ni se, tiin an rel.
Tun dinhmunah Mizoramah digital signal pek chhuah phalna {Multi System Operator (MSO) provisional licence} nei operator pariat an awm mek a; phalna dil, la hlawhtling lo pawh an awm bawk. MSO zingah hian a tam zawkin Set Top Box an vuah tan tawh laiin, la ti thei chiah lo thenkhat an awm bawk a. Chu’ngte pawh chuan April thla tawp lamah chuan tih theih an inbeisei thu an sawi.
Analogue Cable TV signal te digital signal-a thlak chungchangah hian khawpui huam chhunga awmte mai bakah, Mizoram thingtlang khaw tin tuam chhuak vek turin chak taka hma lak tum a ni a. Khaw tina Cable TV Operator-te’n MSO licence nei tawhte hnen atang hian an pawt chhawng ve leh thei dawn a; chutia an pawh chhawn chuan Local Cable Operator (LCO) tih an ni ang a. Anni hian Last Mile Operator (LMO) te hnenah an pe chhawng ve leh thei ang.
Cable TV operator, LCO emaw LMO emaw ni turte chuan an hnen atanga connection pawttute’n digital signal an dawn ve thuai theih nan leh kum 2016 ral hmaa Mizoram pumah digital signal hman a nih vek theih nan an duh ber MSO pan a, tih tur tulte bawhzui ve zung zung tura beisei an ni a. Chumi atan chuan District tina Nodal Officer-te pawh chak taka hma la tura hriattir ni se, tih a ni.
He Meeting-ah hian GAD bakah, I&PR Department atangin officer eng emaw zat an tel a. MICODA, LPS, Zonet leh District hrang hranga Cable TV aiawhte an tel bawk a ni.
