Rampum huapa Ministry of Women and Child Development-in Anganwadi Worker thawkthate hnena chawimawina tangkafai a pek thin chu vawiin khan Mizoram chhunga thawktha mi 5 te hnenah Social Welfare Minister Pu. P.C. Lalthanliana’n a hlan.
He lawmman semna pual inkhawm hi Vanapa Hall-ah neih a ni a, Social Welfare Director Pi. Vanlaldini kaihhruaiah thusawiin Minister chuan lawmman dawngte hnathawh fakin, mahni hnathawha lungawi tak leh tui tak leh theihtawp chhuah thin mi te hi mi awhawm tak an ni, a ti. Minister chuan Mizoramah duh ang zat Anganwadi Centre kan la neih theih rih loh thu a sawi a, building, ei tur leh thawktu te hlawh sawrkarin a tum laiin a enkawl hna leh buaipui tak tak zawk te erawh khawtlang nu leh pa, khaw mipuite mawhphurhna thui tak a nih thu a tarlang. Mizoram-in Anganwadi Centre tam zawk a neih theihna turin sawrkar laipuiah chak taka nawr mek a ni, a ti bawk.
Social Welfare Commissioner & Secretary Pu Ranbir Singh pawhin thusawiin tunlai khawvelah India rampuma mamawh ber pakhat chu nu leh naupang thangthar zel hmakhaw thlira kawng tinrenga an hmasawn leh changkanna tur dapchhuah hi a ni, a ti. Sum leh pai dinhmuna inthlauhna thang chak lutuk ta te, hmeichhia leh mipa inthliar hranna avanga khawtlangin harsatna a tawh mek karah hian naupangte kawng dika chherchhuah chu Anganwadi Worker te kutah thui takin a in nghat a ni, a ti.
State tinah kumtin Anganwadi Worker thawk tha 5 thlan a ni thin a, Mizoram atanga he lawmman dawngtute chu 1). B.Sangthuami, Khawzawl Anganwadi Center 3, Khawzawl ICDS; 2). Lalhmunmawii, Durtlang North-I Anganwadi Center, Tlangnuam ICDS; 3). Hmingthansangi, Tualcheng Anganwadi Center Champhai ICDS; 4). Tlangchhuanmawii, Zawngin Anganwadi Center I, Phullen ICDS leh 5). Zohmingthangi, Saron Veng Anganwadi Center-II, Urban ICDS te an ni a. Chawimawina thuziak leh tangkafai cheng 5000 theuh an dawng a, Minister-in lawmpuina thilpek Mizo handloom bag a hranpain a pe bawk a ni.
Tun dinhmunah hian Anganwadi Center 1980 leh ICDS Project kalpui mek 27 a awm a, Anganwadi Center 252 chu sawrkar laipuiah dil mek a ni.
