343/2025-2026

Aizawl dated 26th April 2025 : Vawiin chawhma khan AH&Vety Department, Mizoram State Veterinary Council leh Indian Veterinary Association (Mizoram) tangkawp chuan chuan 'Animal Health Takes a Team' tih thupui hmangin Veterinary Polyclinic Hospital, Khatlaah World Veterinary Day 2025 pualin hun an buatsaih a. Dr.Robert Rualthankhuma, President,IVA, Mizoram Branch chuan hun kaihruaiin, Dr. F.Lalramhluna, Additional Director (VS&PH) chuan World Veterinary Day 2025 thupui sawi zauna hun a hmang a. He ni pual hian a mamawhte tan, Ui leh Zawhte vaccine pek nghal a ni.

Dr. F.Lalramhluna, Addl Director chuan World Veterinary Day 2025 thupui atan 'Animal Health Takes a Team' tih chuan ran hriselna enkawl kawngah Veterinary Doctor mai bakah Veterinary Technician-te, Public Health lam a thawktute, ran chaw tha leh hrisel awm tura thawktu Agriculturist-te leh ran vulhtute tanrual leh thawhho a pawimawh zia a tarlan thu a sawi a. Ran leh mihring chu inzawmna thuk tak nei an nih angin ran hriselna chuan mihring hriselna pawh thui tak a nghawng thin thu sawiin khawtlang hrisel siam tur chuan ran hriselna ngaih pawimawh hmasak tel a tul thu a sawi.

Dr. V.Lalzarzova, Vice-President,IVA chuan lawmthu sawina hun hmangin Free Anti-Rabies Vaccine pekna hun hman chhunzawm a ni a. He hun ah hian ran 150 Chuang vaccine pek a ni. He ni pual hian DDK Aizawlah World Veterinary day thupui sawihona neih a ni a, Ni 10 April khan Animal Health Camp,Saitualah neih a lo ni tawh bawk a ni.

Tun dinhmunah Mizoram State Veterinary Councilah member  405 an awm mek a, kum tinin World Veterinary Day hi April thla inrinni hnuhnung berah neih thin a ni a. Veterinary Doctor ten ran hriselna venhimna leh enkawlna kawnga infuihtharna hun atan leh a thlawn a ran hriselna endikna hun atan hman thin a ni.