959/2023-2024

Aizawl, the 28th June 2023 : Animal Husbandry & Veterinary Department changtu Minister Er. Lalrinawma’n vawiin khan Tanhril a Department hmun hma pawimawh tak 2 a tlawh a, chungte chu Ramrikawna ranchaw herna hmun Animal Feed Plant leh Tanhrila ar note awpkeuna hmun Zoram Poultry Development Society Hatchery Farm te an ni.

Heng hmun a tlawhnaah Er. Lalrinawma chuan Mizoramin sa leh artui a kan intodelh nana Department-in hma alo lak tawh nate chuan rah tha a chhuah nia a hriat thusawiin heng hmuna thawktute chu heng kawngah kan intodelh nan theihtawp chhuah zel turin a chah a. Animal Feed Plant chuan ran vulhtu mamawh zawng zawng phuhru lo mahse phai lam atanga lolut ranchaw aiin a man a tlawm zawk avangin ran vultu tan malsawmna a ni thei a, chutiang bawkin ar note awpkeuna hmun hma tihlen mek zawh hunah ar vulhtuten broiler chitha leh mantlawm zawka an lei theihna a siamsak ngei a beisei thu a sawi.

Ran chaw herna hmun Animal Feed Plant hi kum 2003 bawr vel khan din a ni a. Kum 2018 khan NABARD hnuaia RIDF XX sum cheng nuai 523.53 sengin ran chaw herna hmun khawl leh hmun hma dangte bun belh leh a ni a. Animal Feed Plant a ranchaw herna khawl pahnih te hian Nikhat ran chaw quintal 120 vel an herchhuah thin a, layer leh broiler chaw chi thum ve ve te, vawk chaw leh bawng chaw atan feed te pawh an siamchhuak a ni. Sawrkarin a revolving fund nuai 30 a pek atangin Animal Feed Plant hi amah leh amah a inchawm a, a enkawl turin Department in Management Committee a siam bawk. Helai hmun enkawltu Dr V. Lalzarzova, Deputy Director, AH & Vety. Department sawi danin helai hmun ran chaw an siamchhuah te chu phai atanga ranchaw lut aiin a tlawm zawk a, a tlawm zawkna chhan chu Plant hi hlawkna nei lo ‘no loss no gain’ a enkawl a nih vang niin a sawi.

Zoram Poultry Development Society (ZPDS) INDBRO Poultry Hatchery Farm, Tanhril hi AH & Vety. Department farm hlui Regional Broiler Chick Farm, Tanhril hmunah NABARD RIDF XVII project “Establishment of Hatchery Farm at Tanhril, Aizawl” sum hmangin bul tan that a ni a. May 2015 khan mipui rawng bawl turin hawn a ni a. ZPDS Farm hi ama ke a a din theih nan kum 2015 khan AH&Vety Department in Capital fund/Revolving fund Rs. 40,00,000/- a pe a. He fund hi Parent Stock lei nan, Archaw lei nan, Electric/Tui bill, Staff hlawh, Damdawi leh farm inrelbawlna a tul apiang thawh nan hman a thin a ni.

Mipui mamawhna a san em avangin ZPDS Hatchery Farm ti lian tur hian 20th July 2020 khan NABARD (RIDF) ah kar khata ar note 40,000 thar theihna tur project theh luh a ni a, 17th Nov 2020 khan Planning Department hnuai Special Assistance to State For Capital Expenditure (SASCE) ah project dang theh luh leh a ni. Heng hna tunah hian hi thawh mek a ni, hun reilotea zawhfel beisei a ni. Tun thlengin he farm hian artui 25,70,740 leh Arte 16,98,100 a thar chhuak tawh a, Sawrkar ah Revenue Rs.32,85,679.89 a chhung lut tawh bawk a ni.

Minister hi AH & Vety. Department hotute – Director Dr. Lalrinpuii Sailo; Addl. Director Dr C. Lalrintlunga leh senior officer dangten an tawiawm a ni.