960/2023-2024

Champhai, the 28th June, 2023: Environment, Forest & Climate Change (EF&CC) e Pu T.J. Lalnuntluanga chuan Champhai Zotlang hmunhlui Botanical Garden-ah Nature Learning Centre (NLC) dinna tur lungphum chu vawiin chawhma dar 11:00 khan khuallian niin a phum.

Khuallian Pu T.J. Lalnuntluanga chuan Champhaia hmasawnna ruhrel pawimawh tak Nature Learning Centre (NLC) dinna tur lungphum phum fel a ni ta chu lawmawm a tih thu a sawi a. Champhai leh a chhehvela a enkawl Department hmalaknate tarlangin, kumin September thlaah Conservator of Forests (CF) Office, Champhai hawn hman tum a ni, a ti a. Nikum maiah Champhai Zotlang hmunhluiah Botanical Garden project lungphum phum a nih thu sawiin, hengte hi vawilehkhata hlawhtling nghal mai tur ni lo a hlawhtlin nana hun duh deuh tur a ni a, tangkai taka an hman theih nan mipui hnenah a nihphung leh tangkainate zirtir a tul a ni, a ti a. Botanical Garden leh Nature Learning Centre din a nih theih nana Zotlang khawtlang leh Department thawktute hmalakna fakawm a tih thu a sawi a. He hmunah hian thil zirna hmun pawimawh tak Interpretation Centre dah a nih dawn thu leh zirbingna hmun pawimawh tak a la nih dawn thu a sawi bawk.

EF&CC Minister Pu T.J. Lalnuntluanga chuan ramri depa awm hmun pawimawh tak Champhai District-ah hmasawnna ruhrel hrang hrangte siama hmalak mek zel a nih thu sawiin, Tlangsama Mini Zoo dinna tur ziaka phalna hmuh tawh a nih thu te, Ecotourism leh Cultural Centre dinna turte buaipui mek zel a nih thute a sawi bawk a. Khawvel hmasawn leh changkang zelah mipui thinlungah environment humhalh duhna a awm chhoh zel thu pawh sawiin, hei hian mipui kan thangharha hma kan sawn ve zel tawh tih a lantir a ni, a ti a. Khuarel mawina thing leh mau, nungcha leh tuihnate humhalh a tul thu sawiin, hei hi hnam ziarang leh nunphung humhalh nan pawh a pawimawh hle a ni, a ti a. Nature Learning Centre behchhana zirna lama pawimawh tak, hmun danga hmalak dan zirchianna neih chungchang pawh ngaihtuah tel a tul dawn thu a sawi bawk a. Kalkhawmte chu ramngaw leh nungcha humhalh kawnga tha thlah lova theihtawp chhuah turin a sawm a ni.

Thusawitu dang Champhai District Bawrhsap Pu James Lalrinchhana chuan EF&CC Minister hmalaknaa Champhai Zotlang hmunhluia Botanical Garden mai bakah hemi nena kalkawp tlat tur Nature Learning Centre lungphum vawiina phum a ni leh ta chu lawmawm a tih thu sawiin, Mizorama a hmasa ber tur leh awmchhun ni tur Champhaiin a nei chu chhuanawm a tih thu a sawi a. Hripui leng avanga harsatna hrang hrang tawh kara hmasawnna ruhrel duhawm tak tak sual chhuah a ni chu lawmawm a tih thu pawh sawiin, Botanical Garden leh Nature Learning Centre-te chu hlawhtling taka kalpui a nih hun a nghahhlelhawm tawh hle a ni, a ti a. Botanical Garden leh Nature Learning Centre project kalpui chhoh mekte chu District mai bakah Mizoram tana rohlu tak a nih ngei a beisei thu a sawi bawk.

Nature Learning Centre chungchang sawifiahtu DFO Champhai Pu Lalduhthlana chuan Nature Learning Centre leh Botanical Garden-te chu project kalkawp leh inngheng tlat tur a nih thu sawiin, a hmunhma thuah Botanical Garden ram awmsa bakah Nature Learning Centre dahtel nan hmunhma zauh a tul dawn thu a sawi a. Nature Learning Centre tha taka kalpui a nih theih nan inkaihhruaina danin a phut angin Advisory Committee dinfel tawh a nih thu a tarlang a. State tina pakhat zel awm tura tih a nih thu leh vawiina a lungphum phum tak Nature Learning Centre chu Mizorama bultanna leh awmchhun a nih thu a sawi a. NLC chu Zoological Park leh Botanical Garden behchhana awm tura tih a nih thu tarlangin, hemi a nih avang hian Botanical Garden Zotlang hmunhluiah hian dah a ni ta a ni, a ti bawk.

He hun hi Pu Lalbiakchhunga, Zotlang VCP chuan kaihruaiin kalkhawmte lawmna thu a sawi a. Pu Jonathan Lalhruaitluanga, RO Champhaiin lawmthu sawiin program hi a khar a ni a. Hemi hnu hian Khuallian leh a mah tawiawmtute'n Champhai Zotlang hmunhlui Botanical Garden-ah thing an phun a ni.

Nature Learning Centre Mizoram, Champhai Zotlang hmunhluia din tur hi kum 3 chhunga thawh zawh tur niin, hemi atan hian cheng nuai 399.04 ruahman a ni a. Hmalakna tur zingah thawktu tur lak, training, workshop, seminar, nature tour leh adang buatsaih te, Amphitheatre Nature Trail, Mini Museum leh Orchidareum siam te, ram dang atanga dan lova nungcha leh thlai lakluh khawina tur siam te, nature camp-na tur hmanraw lei te, mipui zirtirna tur hmanraw duan chhuah leh Seed orchard din te, Solar power bun te, thing hming chhinchhiahna leh herbarium siamte bakah tul dangte a tel a ni.

Nature Learning Centre (NLC) hi National Mission on Himalayan Studies-in Himalayan tlang dung state 8, ram zia danglam leh nungchi (biodiversity) chi hrang hranga hausa tak takte huamchhunga ramngaw, nungcha leh environment-te chak zawka humhalh a nih theih nana din a ni a. A thil tum tlangpui zingah nungchi leh ram leilung hausakna humhalhna tura ruahmanna siam leh mipui hnena zau taka puan darh te, midang hnena zirtirna pe chhuak leh thei turte zirtirna pek te, khawmual leh tuia ram leilung hausakna chi hrang hrang humhalh te, ram hausakna ti chhe lo zawnga eizawnna neih te, hmun danga awm ve lo nungchi hrang hrang vang tawh leh mang mai hlauhawm chi humhalh te leh ramngaw ti chhe zawnga eizawnna kalpui mek thlakna tur ngaihtuahte a tel a ni.