143/2025-2026

Aizawl dated 11th April 2025: Vawiin chhun khan AH & Vety Minister Pu C.Lalsawivunga chuan Mithun Multiplication Centre, Lungkawlh Serchhip District chu a hawng a. Pu Lalmuanpuia Punte, Adviser to Chief Minister chu khual zahawm niin Dr F.Lalramhluna Addl Director (VS&PH) chuan he hun hi a kaihruai a ni.

Khuallian Minister Pu C.Lalsawivunga chuan  ram hmasawn ni tur chuan intodelh a pawimawh hmasak thu tarlangin ei leh bar, a bik takin sa a kan intodelh theihna tur hmanraw pawimawh tak mai hawng thei a buatsaih a ni chu lawmawm a tih thu a sawi a. Mithun Multiplication Centre-in ei leh bar a intodelhna a thlen theih nan Department-a mithiam thawktute leh Sial vulhtu society-ten neitu nihna thinlungpu chunga thahnemngai taka bul an tan a pawimawh thu a sawi. Minister chuan Mithun Multiplication Centre, Lungkawlh chu ran chi tha leh hrisel thar leh semchhuahna hmun pawimawh a nih theih nan duhsakna hlanin hri lak a ran an him theih nan FOCUS 2.0 atangin Bio security fencing te pawh beisei a nih thu a sawi.

Khual zahawm Pu Lalmuanpuia Punte, Adviser to Chief Minister pawhin thusawiin Project tha tak siam a ni chu lawmawm a tih thu a sawiin hlawhtlinna tluantling thlen turin thawktute leh Sial vulh lam a tui mite inpekna a pawimawh thu a sawi. 

Dr.Robert Rualthankhuma, Deputy Director (P&M) tarlan danin Mithun Multiplication Centre hi Lungkawlh Sial vulh Co-operative Society ten kum 2022 a Sesih leh Luangphul ram,Lungkawlh, Serchhip District-a din turin he project hi North Eastern Council (NEC) hnuai ah dilna thehluh angin Rs Nuai 531.83/- senga siam a ni a, Contractor-te hi AIE Construction,Tuikhuahtlang, Aizawl a ni. He Centre-ah hian Sial In te, Watch tower, Isolation ward, Bio security fencing, Solar lighting system, Surgical instruments, Vaccine, damdawi leh tuldangte dah a ni a. He project hi hlawhtling taka kalpui a nih hun ah chuan Sial chi tha  tam tak vulh pun a, hlawk leh  awmze nei zawk a sial vulh te, Sial vulhtute sum lakluh tih pun te a ni dawn a ni.  Lungkawlh Sialvulh Farming society ah hian member 62 an awm mek a ni. Dr H.Vanlalrawna, DAH & VO, Serchhip chuan lawmthu sawina hun a hmang bawk a ni.