3121/2024-2025

Aizawl, the 21st November, 2024: Animal Welfare Board of India (AWBI) aiawh Dr. RB Chaudhary chuan November ni 17-20, 2024 chhung khan Mizoram a rawn tlawh. 

Dr. RB Chaudhary hian a cham chhung hian AH & Vety. Department Director Dr. R. Zothanmawii leh Nodal Officer-te hmuin, Animal Welfare Board of India din chhan leh hmalak an tum dante a sawipui a. JB Foundation din Animal Rescue Centre, Bungbangla pawh tlawhin Centre dintute Pi Ramzirsangi leh Pi Lalrokimi Pautu te'n lo dawngsawngin an fankual pui bakah hmalak dante an lo hrilhfiah a ni.

Dr. RB Chaudhary chuan mi tlawmngai leh ran hmangaih avanga thahnemngai tak takte'n ran chhanchhuahna hmun Animal Rescue Center changtlung tak an din thei chu lawmawm a tih thu a sawi a, a hmunhma hman hawhtirtu A.H & Vety. Department chungah pawh lawmthu a sawi bawk.

Animal Rescue Centre, Bungbangla-ah hian tun dinhmunah Ui 40, Kel 1, Zawng 1 leh Zawhte 12 te enkawl mek an ni a. Ran enkawl chhunzawm theih lohte, tihduhdahna tuar enkawl tura lakte leh neitu awm lo khawlaia chharte chu he hmunah hian hmangaih taka enkawl an ni a. A enkawlna senso hi mi tlawmngai, ran hmangaihtute sum thawhkhawm tlingkhawm atanga ruahman a ni deuh ber a ni.

Animal Welfare Board of India (AWBI) aiawh  hian JB Paws Hospital, Thuampui, Aizawl pawh tlawhin thawktute a kawm a. AMC Commissioner Pu Joseph H. Lalramsanga pawh hmuin Animal Welfare chungchanga hmalak theihna turte leh mawhphurhna chungchang a sawipui a ni. 

Dr. RB Chaudhury hian Animal Welfare chungchangah North East State hrang hrangte a tlawh mek zel a. Mizorama a cham chhung hian AH & Vety. Department atangin Dr. Lalfamkima, Deputy Director (VE&E) leh Dr. C. Neihthangpuii, Deputy Director (VPH) te'n an tawiawm a ni.