3122/2024-2025

Dated Lawngtlai, 21st November 2024 : Vawiin chawhma dar 11 khan Pu Lalmuanpuia Punte, Adviser to Chief Minister chuan Bangladesh atanga raltlante chungchangah Lawngtlai District Bawrhsap leh Officials- te DC Conference Hall- ah thutkhawm a neih pui a. Pu Cheemala Siva Gopal Reddy, IAS, Deputy Commissioner, Lawngtlai District chuan thutkhawm hi a kaihruai.

Pu Lalmuanpuia Punte chuan thutkhawma lo kalte hnena lawmthu sawina a nei hmasa a. Bangladesh atanga raltlan awm mekte dinhmun enfiah bakah ral tlan lo lut leh tur an awm pawha mimal  zawka lo dawngsawn  dan tur zirchiang tura lokal an nih thu a sawi a. Raltlan ten awmna tur atan a an duh duhna hmun  an thlang emaw   hmun hrang hranga an  kal kual thin chu thil fel lo tak a nih avangin, mumal zawka inkaihhruaina siam a tul hle a ni, a ti. Raltlan  enkawl kawngah hmun khata awmkhawm annih chuan sawrkar tan pawh hmalak a awlsam dawn tih sawiin Adviser to Chief Minister chuan hmun khata awm khawm tura hmalak mek a ni, a ti.

Pu Lalmuanpuia Punte chuan Bangladesh atanga raltlante chu hmun li - Parva, Damdep-II, Cherluitlang leh Saizawh 'W' ah sawn khawm tura ruahmanna siam mek a ni, a ti a. Heng khua pali zirchiang tur hian Study Team ten nimin lama an tlawh vek tawh thu sawiin, khawtlang hruaitute pawh sawipui tawh an nih thu a tarlang. Study Team - te hian an thil zirchian leh enfiah te  chu sawrkara 'High Level Committee on  Bangladesh Refugees' ah an thlen leh tur thu Pu Lalmuanpuia Punte chuan a sawi bawk.

Pu Cheemala Siva Gopal Reddy, IAS, Lawngtlai bawrhsap chuan Lawngtlai chu Myanmar leh Bangladesh ramri a awm a nih angin raltlan an tam thu sawiin, tun dinhmunah raltlan Myanmar - 6030, Bangladesh- 2014 bakak Manipur atangin IDP - 84 an awm mek tih a tarlang a. Pu Cheemala Siva Gopal Reddy chuan Raltlante  enkawl kawngah theihtawp chhuah a nih thu sawiin, tunah hian Raltlante tan buhfai sem mek a ni,  a ti. Myanmar, Bangladesh leh Manipur atanga raltlante chhawmdawl kawngah Sawrkarlaipui leh Mizoram sawrkar duh dan leh thupek ang a hmalak zel a nih tur thu a sawi.

Vawiin thutkawmah hian Pu Lokeshwaran R. Superintendent of Police ( SP), Pu Zoramsiama Hmar, Addl. DC, Pi Margaret J. Vanlalremmawii, SDO (S), Pu C. Lalfakmawia, OSD- Home Department, Line Department aiawh leh President, Mizoram Bawm Students'  Association ( MBSA)  te an tel thei a ni.