3122/2024-2025

2024 Sahmulphah thla ni 21: Lunglei District Bawrhsap Pu R. Lalṭhazuala hma laknaa HDFC RSETI hnuaia District Jail Lungleia house wiring training buatsaih tur chu vawiin khan Additional Deputy Commissioner Pi Rochuangkimi Khenglawt chuan a hawng.

Pi Rochuangkimi Khenglawt chuan Deputy Commissioner Pu R. Lalṭhazuala hma laknaa HDFC Bank aṭanga RSETI hnuaia thiam thil inzirtirna hun buatsaih theih a ni chu lawmawm a tih thu sawiin, training turte pawh rilru leh tihtak zeta training tur leh ei zawnna ngelnghet atana hmang thei tura chhawr tlak thiamna puak chhuah tum ṭheuh turin a chah a. District Jail Lungleiin Krismas leh Kumthar vuakveta an hman atan sum fai ₹ 20,000/- a hlan nghal bawk.

Vawiina HDFC RSETI hnuaia house wiring training hawnna inkhawm hi Soft Skill Trainer Pi F. Lalruatfeli chuan a kaihruai a. District Jail Superintendent Pi Lalrampari SDC pawhin thu sawiin, RSETI te'n District Jail-ah training ṭha tak an buatsaihsak thei chu lawmawm a tih thu a sawi bakah, tun mai ni lo, nakin zelah pawh trade hrang hrang - puanṭhui, computer hardware & software leh thiam thil dang training te pawh la buatsaih zel tura ruahman a nih thu a tar lang bawk.

District Jail Lungleia HDFC RSETI hnuaia house wiring training buatsaihah hian a bul ṭan nan training tur mi 34 thlan chhuah phawt an ni a. Anni hian ni 30 chhung training an nei ang a, an zir zawhah Ministry of Rural Development hnuai aṭangin NSQF Qualified Certificate hlan an nih dawn bakah, HDFC aṭangin an bul ṭanna tur remchang ruahmansak an ni dawn bawk a ni.


Attachment

  • Loading attachment...