3123/2024-2025

Champhai, 21st November 2024: Govt. Gandhi Memorial High School Kum 75, Platinum Jubilee tlin lawmna pui ber chu vawiin khan hman a ni a. He hun hi Pu K. Sapdanga, Home Minister chuan khuallian niin a hmanpui.

Khuallian chuan Pu R Khawbula (L) leh Pu Rohmingthanga(L) Headmaster lo ni tawhte hriatrengna chawlhbuk a hawng a. He mi hnu hian Pu HT Vanlalsawma Chairman, Jubilee Organising Committee kaihhruainain Jubilee lawmna School tualah nei a ni.

Khuallian Pu K. Sapdanga chuan he hunah hian thu sawiin, he sikul aṭang hian mi chhuanawm tak tak leh mi hmasa - IAS, IPS,  Engineer leh a dangte an lo chhuak tawh ṭhin a ni, a ti a. GM High School chhuak te chu Mizoram pum titi leh hriat hlawh an ni ṭhin tih pawh sawiin, vawiina zirlai kalkhawmte chu mi hmasate sulhnu chhui a, ram pum tana mi chhenfakawm nih tum turin a chah a ni. 

DP&AR Minister ni bawk Pu K. Sapdanga chuan Mizoramin All India leh Central Service Regular Recruit/ Direct Recruit kan nei tlem tial tial a, kan neih chhun te pawh kan chang vek thei lo tih a sawi a. Mizoram District hrang hrangah Mizo ngei DC leh SP dah duh ṭhin mah ila, kan indaih miau loh avangin hnamdang dah a ṭul a ni tiin zirlaite chu he lam kawnga an ngaihtuahna te seng turin a fuih bawk a ni.

Pu K. Sapdanga chuan hlawhtling tur chuan mi hlawhtlingte zir anga zir mai hi a kawng awlsam tak a nih thu a sawi a. Tun aṭanga kum 19-ah chuan GM High School a lo zir tawh te hi Mizoram puma a thiam ber ber ni thei se a duh thu sawiin,  zirlaite chu tun aṭanga tan la a, zirna kawngah theihtawp chhuah turin a chah a ni.

He hunah hian Pu Vanlalzama, Secretary Organising Committee hnen atangin report ngaihthlak a ni a. Er Hrangthanga Zote, CE PWD(Ex Student) in Souvenir a tlangzarh a, Pi K. Lalthiangi, Senior teacher kaihhruainain he school-a lo thawk hlui tawh te chawimawina hun hman a ni a, Govt. GM High School-a Headmaster lo ni tawh thi tawh te sunna hun hman niin tlaiah Jubilee ruai kilho a ni.

Govt. GM High School hi Kum 1949 ah din a ni a, kumin hi an kum 75-na a ni. Tunah hian zirlai naupang 232 awmin Zirtirtu 14 leh IV- Grade 1 an awm mek a ni.