No.4174/2021-2022
Aizawl Vau thla ni 3, 2022: Vawiin khan ANM (Auxiliary Nurse Midwife) School, Lawngtlai chuan LADC Conference Hall-ah 5th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) an buatsaih.

He hun hi Lai Autonomous District Council (LADC)-a Chief Executive Member (CEM) Pu V. Zirsanga'n hmanpuiin, lawmpuina leh fuihna thu a sawi a. ANM School Lawngtlaiin result tha tak an nei thin chu Lawngtlai District tihmingthatu a ni tiin, Principal leh thawktute inpeknaah a fak a. ANM zirlaite'n lukhum var khum a, khawnvar an chhit chu a awmze dik tak ngaihtuah chunga an zirna leh hna thawhnaa a taka nunpui tura chahin, khawnvar engin beiseina a entir angin buaina leh harsatnain khawvel a tuam laia beiseina eng chhitu nih tum turin a chah a. Mi dang tana malsawmna nih leh thil tha tih tluka nun hlimna a awm lo tih sawiin, sathau khawnvar anga mi dang tana inpe leh luang ral a, damlote thinlung hliamtu aia hlimna petu leh beiseina siamtu nih tum tlat turin a fuih a ni.

He hunah hian District Hospital Lawngtlaia Nursing Superintendent Pi Lalengmuani chuan 5th batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk.

He hun hi ANM School Female Voice te'n zaiin an hawng a. Christian Hospital Lawngtlaia Staff Nurse Pi Lalriveli chuan hunserh hmangin, School Principal Pi C. Rothangpuii'n school report tlangpui a sawi a. Khual zahawm Lawngtlai Chief Medical Officer Dr LP Malsawma bakah, LADC Executive Secretary Pu H. Lalramenga leh CYLA AGS Pu Joseph Lalhmingthanga Chinzah te'n thu an sawi a. Kum 2021 Mizoram Nursing Council examination-a ANM School Lawngtlai atanga top ten-a lang 1st year zirlai mi pathum leh 2nd year zirlai mi pali hnenah chawimawina (proficiency award) hlan a ni a. Tutor Pi PC Lalhmangaihi'n lawm thu sawiin, Lairam Isua Krista Baptist Kohhran AOC Bialtu Pastor Rev. Dr V. Lalhmingsanga'n zirlai tharte tawngtaisakna hun a hman bakah, malsawm tawngtaiin hun a khar a ni.

He hunah hian LADC-a Executive Member i/c I&PR, etc. Pu Lalropuia Chinzah leh EM i/c Education (P/S), etc. Pu L. Daniala te, health department-a thawktute, sawrkar official-te, District MJA member-te, tlawmngai pawl ai awhte, ANM School Lawngtlaia zirlaite leh zirlai nu leh pa te leh sawm bikte an tel a ni.

ANM School Lawngtlai hi October 2017 khan zirlai 20 awma bul tan niin, batch thumin an zir chhuak tawh a. Tunah hian Principal pakhat (1), Tutor pali (4), Non-teaching staff pariat (8) leh zirlai 40 an awm mek a. Pawl 12 pass hnua zir theih niin, kum 2 zir tur a ni a. Session hi October-September a ni. Tun tumah hian 1st year zirlai sawmhnih (20)-in thu tiam an la thar a ni.