3549/2022-2023

Ramtuk thla ni 10, 2023: Vawiin khan ANM (Auxiliary Nursing Midwifery) School, Lawngtlai chuan an School Auditorium-ah 6th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) an buatsaih.

He hun hi District Hospital Lawngtlaia District Medical Superintendent Dr Beiparysa K. chuan hmanpuiin, zirlaite fuihna thu a sawi a. ANM School-in "Learning for life" tih thupui an neih chu zirlaite'n nun chhuahpui a, nuam ti taka an zirlai zir tur leh hna an thawhnaah pawh zir chhuah neih tum zel turin a chah a. An zirtirtute leh damdawi ina thawktute hnenah an zir laia an hriat thiam loh zawh hreh lo tura fuihin, an awm dan, chezia leh ṭawngkamin mi tam tak nun a nghawng dawn avangin fimkhur tur leh damlo an enkawl laiin hah hmel leh hlim lo hmel put loh hram tum tur te'n a chah a ni.

He hunah hian Nursing School Lungleia Principal Pi F. Laltlangmawii chuan 6th batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk. Pi F. Laltlangmawii chuan lukhum chuan mi dang ṭanpui tura mawhphurhna a ken tel thu leh a rawng var chuan thianghlimna a entir thu sawiin, khawnvar hala chhit chhawn chu mi dang tana eng chhuak tur te, inchhem alh tawn tur te leh thiamna leh mawhphurhna inhlan chhawng tura Florence Nightingale-i khawnvar chhit chhunzawm zelna a nih thu a sawi.

He hun hi Tutor Miss RC Vanlalhlimpuii'n kaihruaiin, ANM School Lawngtlai Female Voice te'n zaiin an hawng a. Lairam Christian Medical Centre & Hospital, Lawngtlaia Ward Superintendent Pi C. Lalchhuansangi chuan hunserh hmangin, School Principal Pi C. Rothangpuii'n school report tlangpui a sawi a. BCM Electric Veng Lawngtlai Chairman Upa A. Suiṭhiaua leh LCMC&H-a Nursing Superintendent Pi TC Lalfinengi te'n thu an sawi a. Kum 2022 Mizoram Nursing Council examination-a ANM School Lawngtlai aṭanga top 10-a lang 1st year zirlai mi pathum leh 2nd year zirlai mi pali hnenah chawimawina (proficiency award) hlan a ni a. Tutor Pi PC Lalhmangaihi'n lawm thu sawiin, District Hospital Lawngtlaia Chaplain Rev. C. Lalnunthara'n zirlai tharte ṭawngṭaisakna hun a hman bakah, malsawm ṭawngṭaiin hun a khar a ni.

He hunah hian health department-a thawktute, sawrkar official-te, ANM School Lawngtlaia thawktute, zirlaite leh zirlai nu leh pate leh sawm bikte an tel a ni.

ANM School Lawngtlai hi October 2017 khan zirlai 20 awma bul ṭan niin, batch 4-in an zir chhuak tawh a. Tunah hian Principal pakhat (1), tutor panga (5), non-teaching staff pariat (8) leh zirlai 40 an awm mek a.  Pawl 12 pass hnua zir theih niin, kum 2 zir tur a ni a. Session hi October-September a ni. Tun ṭumah hian 1st year zirlai sawmhnih (20)-in thu tiam an la thar a ni.