3548/2022-2023
Champhai, the 10th February, 2023: Vawiin khan Champhaiah Rulhut hlo ei beihpui thlak hapta, National Deworming Week 2023 hawn a ni. He hun hi Champhai District Bawrhsap Pu James Lalrinchhana chuan khuallian nia hmanpuiin a hawng a ni.

National Deworming Week hawnna hun Govt. Venglai Comprehensive Middle School-a neihah khuallian Pu James Lalrinchhana chuan hriselna kawnga hmalakna pawimawh hmasa rulhut hlo ei leh a pawimawh chhan inzirtirna National Deworming Week chu Sawrkarin a ngaipawimawh hle tih sawiin, naupang zawng zawngte rulhut laka kan fihlim theih nan he hun hi hma thin a ni, a ti a. Rulhut laka him theih nan thil ei dawnah kut silfai that angaih zia a sawi bawk a. Rulhut dona kawnga kan tanrual chuan district dangte umtu ni lovin hmahruaitu kan ni thei dawn a, rulhut natna pawh hi kan do hneh thei dawn a ni, a ti a. India rama naupang maktaduai 241 te chu rulhut kai thei reng dinhmunah an din mek thu leh kum 1 atanga kum 19 inkar naupangte'n rulhut an pai loh hi National Deworming Week-in a tum ber a ni, a ti bawk.

Khuallian chuan rulhut chuan taksaah iron tlakchhamna leh natna dang a keng tel thei a, naupangte taksa bakah an rilru than thlenga a tih thut theih avangin zirna kawngah nasa takin a nghawng thei a ni, a ti a. Kan ram chak leh chak lohna hriltu pakhat a nih theih avangin zirlaiten rulhut hlo an ei ngei chu sawrkarin a ngai pawimawh lehzual tih a sawi a. Rulhut do kawnga Champhai District Department hrang hrangte thawh hona chu lawmawm a tih thu sawiin Champhai District Deworming Week chu lawm takin a hawng a ni.

National Deworming Day hawnna hun hi Dr. R Lianmawia, CMO Champhai chuan kaihruaiin, Pu TT Laltanpuia, DEO Champhaiin inhmelhriattirna hun a hmang a. Pi Vanlalruati, Principal, DIET, Champhaiin thu a sawi bawk a, Pu Lalramzauva, DEIC Manager, NHM hnen atangin Powerpoint Presentation hmangin rulhut laka kan him theih dan tur hrang hrang zirtirna ngaihthlak a ni bawk.

National Deworming Week hawnna hunah hian Champhai District Bawrhsap Pu James Lalrinchhana leh Official dangten naupangte hnenah rulhut damdawi hi an ei tir nghal bawk a. National Deworming Week thawhkhatna pual hian District chhunga target kum 1 atanga 19 inkar mi 23,345 te hnenah rulhut damdawi hi pek hman tum a ni.