3547/2022-2023

Champhai, the 9th February, 2023: District Information & Public Relations Office, Champhai leh MJA Champhai District buatsaih Press Study Tour Team-te chuan February ni 9-10, 2023 chhung khan NH 06 kawngpui siam hna Undivided Champhai District chhunga thawh mek leh Vankal Solar Park thawh mekte an tlawh.

Press Study Tour Team-te hi Dr. Lallawmkima DIPRO Champhai chuan a hova, Team-ah hian Champhai leh Khawzawl District-a MJA Member-te an tel a, Undivided Champhai District chhunga NH06 kawng siam meka package hrang hrang 4: Shri Balaji Construction Company, Anusha Projects Private Limited leh Dhariwal Builtech Limited-te thawh bakah Vankal Solar Park Project, M/S Sunfree Northeast Renewable Energy Pvt. Ltd. leh M/S ATA Renewable P4 Pvt. Ltd. te thawh an tlawh a. Press Study Tour-a tel Champhai leh Khawzawla chanchinbumite chuan hmasawnna ruhrel pawimawh tak thawktute chu hna tlo leh tha tak, nakin zela chhawr tangkai theih tur thawk tura an beisei thu an hrilh a. Pawimawh leh tul an tih angte thlenin, harsatna an neih leh puih an ngaihna zawnah an inhawn reng thu an hrilh bawk.

Shri Balaji Construction Company (BCC) te hian NH 06 Dulte to Champhai huamchhung Package-III, Khawzawl leh Champhai inkar km 26.78 a thui, cheng vaibelchhe 370.43 senna tur an siam mek a, a then laiah lei laih hna thawh mek niin, km 5 vel black topping zawh fel tawh a ni. February ni 9, 2023 thlengin physical progress chu 67.93% niin, financial progress hi 63.03% vel a ni. Package -III hnuaiah hian leidawh 3 awmin, 80-90% vel zawh fel a ni a, culvert 148 siam turah 125 thawh zawh tawh a ni. October 2021 khan hna an thawk tan a ni.

NH 06 Dulte to Champhai huamchhung, Package-II, Tuichang atanga Kawlkulh lam kilometre 1 vel atanga Khawzawl inkar hi Anusha Projects Private Limited (APPL) chuan thawkin, km 12.45 a thui, cheng vaibelchhe 121 senna tur a ni a, a then laiah lei laih hna thawh mek niin, km 5 vel black topping zawh fel tawh a ni. February ni 9, 2023 thlengin physical progress chu 61% niin, financial progress hi 57.5% vel a ni. Package -II hnuaiah hian culvert 78 siam turah 60 thawh zawh tawh a ni. December 2021 khan hna an thawk tan a ni.

Dhariwal Builtech Limited (DBL) te hian NH 06 Dulte to Champhai huamchhung Package-I, Dulte Junction to Tuichang inkar km 17.95 a thui, cheng vaibelchhe 212.36 senna tur an siam mek a, a then laiah lei laih hna thawh mek niin, km 6 vel black topping zawh fel tawh a ni. February ni 9, 2023 thlengin physical progress chu 76.4 % niin, financial progress hi 72.08% vel a ni. Package -I hnuaiah hian leidawh 2 siam tur niin, culvert 66 siam turah 60 thawh zawh tawh a ni. June 2021 khan hna an thawk tan a ni.

NH 06 Seling to Dulte huamchhung, Package-IV, Tuivawl kam Saitual District chin km 4 vel atanga Dulte inkar hi Anusha Projects Private Limited (APPL) chuan thawkin, km 17.16 a thui, cheng vaibelchhe 185.49 senna tur a ni a, forest clearance avanga khaihlak laiah hmalak a la ngai a, km 15 vel black topping zawh fel tawh a ni. February ni 9, 2023 thlengin physical progress chu 91% niin, financial progress hi 89% vel a ni. Package -II hnuaiah hian culvert 90 siam a ni a, October 2020 khan hna an thawk tan a ni.

Press Study Tour Team-te hian vawiin khan North East India-a Solar Park Project lian ber cheng vaibelchhe 150 vel senga Mega Watt 20 pe chhuak thei tur, Vankal Solar Park, Jawahar Lal Nehru National Solar Mission hnuaiah thawh mek pawh an tlawh a. Hemi hnu hian Khawzawl District Bawrhsap Pu C.C. Lalchhuangkima chu kawmna hun an hmang bawk a ni.

Vankal Solar Park bun tur hian kum 2018 atanga bul tan niin, P&E Department chuan power dawng thei turin 132/33 kV Sub-Station pawh a peih fel tawh a. Solar bun hna hi Solar Developer 2: M/S Sunfree Northeast Renewable Energy Pvt. Ltd. leh M/S ATA Renewable P4 Pvt. Ltd. ten kum 2020 atang khan an thawk tan a. M/S Sunfree Northeast Renewable Energy Pvt. Ltd. hian Power MW 15 siamna tur buaipuiin M/S ATA Renewable P4 Pvt. Ltd. in Power MW 5 siamna tur an buaipui thung a ni. Solar plate/module hi avaiin 35,500 dawn vel bun tur niin, tun thla chhunga zawhfel hman an inbeisei a. Solar plate hi tin 125 hmunah bun a ni a, inverter control room 7 siam ni bawkin project pumpui hian tin 140 hmun vel a awh a ni.

Vankal Solar Park hi hripui leng avanga hna a khaihlak avangin a zawh hun tura ruahmanah zawh hman a ni lo a, tun thla chhunga zawh fel hman beisei a ni a. Company-te chhut dan chuan kum khata nisat that zual bik thla 4 vel chu full capacity a pek chhuah theih beisei niin, thla 8 dangahte chuan chawhruala 8 MW vel thlenga siam chhuak thei tura beisei a ni. Hemi atanga power siam chhuah hi Mizoram Sawrkarin man tlawm zawkin Rs 3.94/unit velin a lei thei dawn a ni. Vankal Solar Park-ah hian tun dinhmunah Power lak luh leh pek chhuahna tur 132/33 kV Sub-Station leh Control Room-te zawh fel tawh niin, Saitual lam atanga 132 kV Line lo kal pawh 132/33 kV Sub-Station kaltlang tir a ni tawh a ni.

Press Study Tour Team-te hi NH06 tlawhnaah hian Pu Ram Kumar Tomar, Representative, National Highway Infrastructure Development Corporation Limited (NHIDCL); Pu PL Dhiman, Project Manager, Shri Balaji Construction Company (BCC); Pu Nikitha Simhachalam, Deputy Project Manager, Anusha Projects Private Limited (APPL); Pu Simanta Sharma, Project Manager, Dhariwal Builtech Limited (DBL); Pu Raghu, Deputy Project Manager, Anusha Projects Private Limited (APPL) leh an thawhpui te'n an package-ah zel lo dawngsawngin an tawiawm a. Vankal Solar Park tlawhnaah hian Pu Hrilliantluanga, JE, P&E; Pu Drubjyoti Deb, Asst. Manager, SAEL Ltd; Pu Jitendra Sharma, Project Manager, Electrical, SAEL Ltd. leh thawktu dang te'n an tawiawm bawk.