886/2023-2024

2023 Nikir thla ni 22: Kum 2023-2025 session (7th batch) atana ANM School Lawngtlaia ANM/health worker training diltute tana written test chu vawiin chawhnu dar 1:00 - 4:00 inkar khan Downtown English School, Lawngtlaiah buatsaih a ni.

ANM School Lawngtlaiah hian batch khatah seat 20 awmin, tun ṭumah hian diltu 156 an awm a. Vawiin khan diltute thlit fimna hmasa, written test buatsaih niin; ruahman lawk dan chuan July ni 5-ah result tihchhuah a ni ang a, written test pal tlangte hian July ni 11-ah personal interview an la hmachhawn leh dawn a. Session hi August ni 1, 2023-ah ṭan a ni ang.

ANM School Lawngtlai Principal Pi C. Rothangpuii chuan anmahni school hmunhmain a zawh loh avangin written test buatsaih nan hmun remchang dang hman an mamawh ṭhin thu sawiin, tun hma lam kum ruk chhung chu Government Lawngtlai College-ah buatsaih ṭhin a nih thu leh kuminah chuan Downtown English School-ah buatsaih a nih thu a sawi a. An mamawhnate hriat thiampui a, phal tak leh class ṭhulh meuhva an hmunhma leh hmanruate hmantir ṭhintu Government Lawngtlai College leh Downtown English School te chungah an lawm tak zet, tih a sawi.