885/2023-2024

Aizawl, 22nd June 2023: Vawiin khan Mizoram State Cooperative Union (MSCU) chuan an Annual General Assembly vawi 34-na chu Dawrpui Multipurpose Centre-ah an hmang a, Rural Development Minister Pu Lalruatkima chuan khuallian niin a hmanpui.

He hunah hian Pu Lalruatkima chuan MSCU Assembly a hmanpui thei chu a lawm thu a sawi a. MSCU chu Mizoram-a cooperative society hrang hrang ten thawhhona tha an neih theih nan a khaikhawmtu pawl pawimawh tak a ni, a ti. MSCU in Cooperative Society-te hmasawn nan training a pek thin thu te, sawrkar leh cooperative inkarah palai hna a thawh thin thu te bakah sum leh paia chhawmdawlna a pek thin thu te a tarlang a. Ram sum leh pai dinhmun siamthatna kawnga cooperative societies te pawimawhna hriain sawrkar laipui pawhin Ministry hran ‘Ministry of Cooperation’ a din a ni, a ti.

Minister chuan Mizo nun zemawi – huaisenna, rinawmna leh taimaknate chu society movement-ah tangkai taka sengluh theih a ni, a ti a. Cooperative Society-te hmasawn nan thawhona tha a pawimawh thu sawiin kalkhawmte chu tanrual hi chakna a ni tih hre reng turin a chah a. Khawvel hmasawnna in a ken tel thiamna chhuak thar te pawh hmang thiam tura an rilru hawng ve zel turin a fuih bawk. Vawiin inkhawmpui chuan chhungkua leh khawtlang tan hmasawnna thlen ngei se a duh thu sawiin, ram hausaknate cooperative society kaltlanga dik tak a haichhuaka, chhuan lo awm zel tur te tana ram nuam hnutchhiah turin kalkhawmte chu a sawm bawk a ni.

Vawiin inkhawmpui hi MSCU Chairman Pu K. Lalchamreia chuan a kaihruai a, MSCU Chief Executive officer (CEO) Pu Lalmalsawma Sailo chuan report a pe a. Kum 2022-2023 chhunga MSCU Annual Report leh 2021-2022 Annual Audited Report sawihona leh pawmpuina hun hman a ni bawk.

MSCU hi Aizawl District Assistant Registrar of Cooperative Societies enkawlna hnuaiah kum 1975, March ni 29 khan din niin; hnathawh dan kalphung duanga, kaihruaitu leh a tul anga hma la tu atan Board of Directors (BoD) din a ni a. BoD ah hian President, Vice President leh MSCU CEO bakah elected Board member pali an awm a. Mizoram sawrkar leh state level cooperative societies aiawh te an tel bawk a ni.

Vawiin MSCU Annual General Assembly ah hian kum 2023-2028 chhunga MSCU hruaitu tur thlanna neih a ni a. Hruaitu atana thlanchhuahte chu:

President: Pu K. Lalchamreia
Vice President: F. Lalchungnunga

Board of Directors member ah:

1. Lalrinliana Royte

2. C. Ralkapzaua

3. Zailianthanga

4. Laltanpuia Pachuau, te an ni.