884/2023-2024

Kolasib dated 22nd June 2023: Vawiin khan Parish Hall, Venglai, Kolasibah Green India Mission hnuai a kuthnathawktute ram ngaw siam belhna tur leh sum a chan tir theih thing, rah nei chi phun belhna kawng a hmalakna tur ‘Agro-Forestry leh Social-Forestry’ hnuai a hamthatna awm sem chhuah a ni a. Pu TJ Lalnuntluanga, Minister, Environment, Forests & Climate Change Department chu khuallian niin Pu K.Laldawngliana, MLA, 4-Tuirial Assembly Constituency bialtu chu khual zahawm a ni bawk.

Minister Pu TJ Lalnuntluanga chuan khawvel thang zel avanga khawsak leh eizawnna avangtein kan ram ngaw leh a chhung a nungchate nek chepna leh sik leh sa inthlakthlengna buai nasa lutuk tur ven nan Green India Mission hnuai ah ram ngaw awmsa humhalh leh siam belhna tur a ‘Agro-Forestry leh Social-Forestry’ kaltlang a hma la turin Kolasib district ah mi 237 hmathatna dawng tur an awm chu lawmawm a tih thu a sawi a. Khawvel hi chenna tlak a siam tur chuan ram ngaw, tui hna leh ramsa humhalh a pawimawh thu leh heng te hi mi tin mawhphurhna a nih thu a sawi. EF&CC Minister chuan ram leilung hausakna humhalh chu tun hma atang tawh a ngaih pawimawh a nih thu te, dan mumal tak hnuai a ram ngaw leh nungchate pawh humhalh a nih thu leh heng leilung hausakna hlut thiam tur a inzirtitnate pawh nasa takin kalpui a nih dan te a tarlang a. Mizoram chhung a ram ngaw awm te venhim nan leh ram ngaw siam belh nan kum 1999 atang khan Green Mizoram Day hman tan a nih dan sawiin heng hmalakna te hian thangtharte rilruah leilung hausakna hlut leh dimdawi kawngah awmzia a neih thui hle thu a tarlang bawk a ni.

Pu TJ Lalnuntluanga chuan ram ngaw leh nungcha humhalh kawng a Mizoram Sawrkar hmalakna tithuanawptu leh awmze nei lo a seltu ni lovin tichaktu leh tihlawhtlin puitu ni turin Green India Mission hnuai a hmathatna dawngtute chu a chah a, leilung hausakna chu mi tin mamawh leh intawm a nih angin EF&CC department leh khawtlang mipui inkarah thawhhona leh tanrualna tha a awm a tul thu a sawi. Chief Minister Pu Zoramthanga kaihhruai sawrkar chuan kuthnathawktute dinhmun chawikan a ngaih pawimawh thu Forest Minister chuan sawiin Agro-Forestry leh Social-Forestry kaltlanga huan neitu hmathatna dawng te pawhin heng hmathatna hmang hian sum a chan tir theih thing rah nei chi hrang hrang phun belh kawngah hma an lak tur thu a sawi. Minister chuan EF&CC Department hmalakna in Kolasib district khawpui chhung leh a vel a ram ngaw siamna tur ‘Nagar Van’ project te, Botanical Garden leh JICA kaltlangin Biodiversity Conservation & Forest Enrichment Project kalpui tur a ruahmanna siam mek a nih thu sawiin Mizoram chhung a ram ngaw awmte chu Company lian tak tak ten ‘Carbon Sink’ a hman a nih theih nan indawrna a kal mek thu a sawi bawk a ni.

Khual zahawm Pu K.Laldawngliana, MLA chuan Sawrkar atanga hmathatna awm te chu a nihna tur ang tak a ram ngaw siam belhna tur leh eizawnna tlak tur a thing rah nei chi phun belh tur a hmalak nan hmang turin kalkhawmte a chah a. Rintlak tak a hma la turin leh hlawtlin tum a tihtak zetna nen bei turin a fuih bawk a ni.

Pi Margaret Lalramchhani, IFS, DFO, Kolasib chuan Green India Mission hnuai a ‘Agro-Forestry leh Social-Forestry’ kaltlang hian mahni huan neihsa a thing humhalh leh an eizawnna kawng a pui thei tur thing rah neih chi phun belh tur a hmalak chu a thil tum ber a nih thu leh he hmalakna hi ram ngaw siam belh kawng a thil tangkai tak a nih tur thu a sawi. Pu Thanliana Hauhnar, ACF in vawiin hun hi kaihruaiin Kolasib, Kawnpui, Bualpui leh Bairabi atangin mi 148-te hnen ah 1st Installment Rs. 15000 hlan an ni a. Pu Lalhriatpuia, RO, Central Forest Range chuan kalkhawmte lawmna thu a sawi bawk a ni.

Hamthatna dawngtute hian an huan Hectare 1 a zau ah thing rah nei chi 1100 zel an phun lut ang a, thing tiak hi EF&CC Department-in a thawnin an pe ang a, a hmunhma enkawl nan Rs. 28500 an dawng dawn a ni. Heng hmalakna te hi a bialtu Range Officer-ten an vilpui ang a, hmalakna hmasa hian Kolasib district chhung ram Hectare 237 huam tur a ruahman a ni.