985/2022-2023
Champhai, the 21st June, 2022: Vawiin chawhnu dar 2:00 khan Champhai District Bawrhsap Pu James Lalrinchhana, District Level Coordination Committee on FOCUS Chairman ni bawk kaihhruaina hnuaiah District Level Coordination Committee on FOCUS chu DC Conference Hall-ah kum 2022-2023 chhunga hmalak dan tur annual action plan chungchang relin an thukhawm.

Pu James Lalrinchhana chuan FOCUS hnuaia hmalakna hrang hrangah Line Department-te inkarah inpawhtlanna leh thawhhona tha neih a pawimawh thu a sawi a. Hun bi neia kalpui tur project a nih angin hmalak dan tur kimchang, a hun leh hmalak dan tur ruahman siama chumi zulzuia kal a tul thu a sawi a. Line Department hotute chu mithiam zawk leh thil chinchang hria an nih angin thahnemngai taka loneitute pui turin a chah bawk.

Pu M.S Dawngliana, District Project Manager, FOCUS Champhai hnen atangin hmalakna leh hmachhawpte ngaihthlak a ni bawk.

He hunah hian District Management Unit (DMU) Champhai tana hmalakna tur bituk siamte zirchian niin, khawi hmun leh hunah nge hmalak tha ang tihte ngaihtuahho a ni a. Agriculture Department hnuaia hmalakna tur 6, Animal Husbandry & Veterinary Department hnuaia hmalakna tur 13, Horticulture Department hnuaia hmalakna tur 5 bakah Soil & Water Conservation (LRS&WC) Department hnuaia hmalakna tur 5 chungchangte sawiho a ni a, Department hmalak theih zat leh eng huna thawh tan tur nge tihte uluk taka ngaihtuahho a ni.

Lei tih thatna soil fertility management hnuaiah kum danga tih dan leitha pek ngawt nilo, loneituten anmahni siam an hman theih nan tanpuina pek ni se tih a ni a, DAO chu loneitute 60 te tan project siam tura ruat a ni a, thlai chi tha leh hrisel sem a nih theih dan turte sawiho a ni bawk a. Sangha khawi chungchangah tanpuina unit 700 tan hmalak tum a ni a, unit 400 te chu Paddy cum fish culture niin, 300 dangte chu Sangha chi sem tura ruahman a ni a, heng zinga 40 ah te RD Department nen thawhho tum a ni. DAH&VO chu training leh vaccination schedule felfai tak siam tura tih a ni.

Meeting-ah hian Pu B. Lalchhawntluanga, PD DRDA Champhai leh Line Department hrang hranga DLCC member-te an tel a ni.