986/2022-2023
YMA Model Branch Hnahthial kum 50 tlin lawmna (Golden Jubilee) kal mekah vawiin khan an veng Volleyball Court-ah Vantlang inkhawm buatsaih niin bialtu MLA leh H&FW etc changtu Minister ni bawk Dr.R.Lalthangliana chuan Khuallian niin a hmanpui a, a MLA Fund hmanga sak Library room a hawng nghal bawk.

He huna vantlang inkhawm hi Pu HS.Lalthansanga, Chairman, Golden Jubilee Celebration Committee chuan kaihruaiin Khuallian Dr.R.Lalthangliana chuan "YMA hi tlawmngai pawl a nih piah lamah hmangaihna leh lainatna nena midangte tana luangchhuak thin a ni a, khawvel hmun dangah hetiang pawl hi a awm ve lo" tiin Khawvel ram ropui tak tak te pawh ti mualpho tu hmuhtheih loh Ral 'Covid' dona kawngah pawh YMA hnathawh chu a ropui thu sawiin "kum 2 leh a chanve deuh thaw Covid-in min nuai a, sum tam tak a ral a, Nunna chhan him nan tumah awl thei lovin Sorkar, Kohhran leh pawl hrang hrang te Pathianin thawh hona tha min pein kan pen chhuahna te kha a hlu hle a ni. Loh theih lohin Lockdown a ngai a, Thingtlang miten khawpui-ah a thlawna ei tur an phur lut ruih ruih te leh khawpui mite pawhin tanpuina an han pe let ve thin te kha YMA hle a, khatiang lo liam Pathian rawngbawlna, a taka lantirna hi a awm lo a ni" a ti. Covid mai ni lovin hriat lawk loh harsatna chi hrang hrang - Lirnghing, Vawk pul hri leh Ramri buai bakah Raltlan dawnsawn tulna ten kum 3 dawn Mizoram a tuam thu sawiin "Tun hunah Pathian in hun tha mi pe leh a, zalen taka hun kan hmang thei hi a lawmawmin Pathian hnenah lawmthu i sawi ang u" a ti bawk

Taksa vawn that a, hriselna ngaih pawimawh a ngaih thu Health Minister Dr.R.Lalthangliana chuan sawiin "Natna avanga vanduaina tawk hrim hrim te, Accident te hi kawng dang nise, Chutiang ni lova YMA member kum 30 ral kai lova mual liam kan awm thin hian rilru a luahin veiawm kati thin. Pathian hian kan taksa hi kum reilo tak dam tura min ruahman hi ka ring lova, rei tak dam tur hian min duh ang tih hi a rinawm. Zirlai naupang ten an In atanga an College/School Kilometre 1 vel lek kal nan lirthei an hmang uar hi a veiawmin Ke a kal uar hi YMA ang pawhin kan inzirtir a ngai, chu chuan taksa hriselna a thlen bakah sum a ti hek lo a ni. Hriselna hi a that loh chuan hna thawh theih loh. Eng ang pawhin lehkha thiamin hlawh tam mah ila, kan dam rei loh chuan eng tihna mah a ni lo. Taksa hriselna hian rilru ati hrisel tel" tiin kalkhawmte chu an hrisel theihna tur ngai pawimawh turin a chah a ni.

District nihna chuan Sorkar inrelbawlna a nghawng ang bawkin NGO inkaihhruaina pawh a tha zawngin khawih a danglam tih sawiin Health Minister Dr.Thangtea chuan "Tunhma a MHIP Block leh Group YMA te pawh District nih tak avangin Sub-Headquarters kan ni chho ta hi hmasawnna a ni" tiin District Hospital Hnahthial-ah Integrated Laboratory ruahman aniih tur thu leh CMO Office sak chhoh mek pawh kumina hawn hman loh pawhin nakumah chuan hawn hman beisei a nih thu a sawi a, Medical Superintendent leh Chief Medical Officer neih thuai beisei a nih thu a sawi bawk a ni

Vawiina YMA Model Branch Hnahthial kum 50 tlin lawmna ah hian an Vice President hmasaber Pu H.Thangkima chuan Golden Jubilee lungphun hawngin Baloon a chhuah bawk a ni.

YMA Model Branch Hnahthial hi Ni 21.6.1972 khan Aithur YMA tiin din a ni a, Ni 1.1.2009 atang khan Sorkar thuchhuak angin Aithur Veng hi Model Veng ti a thlak a ni a, YMA pawh YMA Model Branch tiin thlak a ni bawk. An kum 50 tlin lawmna hi Nizan atang khan nei tanin naktuk hian khawtlang huapin ruai nen an lawm dawn bawk a ni.

Bialtu MLA hian Hnahthial Peniel Vengah Hnam Run Building sakna tur lungphum a phum nghal bawk a ni.