Tourism Department huaihawtin vawiin khan Reiek Tourist Complex-ah Anthurium Festival 2009 chu tan a ni a, Tourism Minister Pu S. Hiato-in Festival a hawng. Kumin Anthurium Festival hi a tum 4-na a ni a, a hawnn inkhawmah hian Parliamentary Secretary Pu H. Zothangliana leh bialtu MLA Pu Lalrobiaka pawh an tel.

 

 

Festival hawnna thuchah sawiin Khuallian Pu S. Hiato chuan Kut ni hlimawm takah state chhung leh pawn atanga a chhim tura lo kal zawng zawng te a chibai a buk a. Mizoram hi ram mawi tak Mizote tana Pathian pek a ni a, he ram hi tha taka kan enkawlin kan chei thiam chuan kan tan malsawmna a ni zel dawn a ni, a ti. Toruism Department hmalaknain Kut hrang hrang zinmite hip thei tur buatsaih chho zel a nih tur thu sawiin Minister chuan Mizote chu mikhualte laka hawihawm leh anmahni lo duat thiam kan zir a ngai dawn a ni, a ti. Ram changkang zawkten engkim nei tha zawk mahse Mizorama rawn zin an thlakhlelh chhan ber chu kan hnamzia entur leh kan ram leilung, thing leh mau mawi tak te hi a ni a, chuvangin kan ramngaw leh nungchate hi humhalh tlat ang u, a ti bawk. Mizoram hmun hrang hranga Tourist Lodge leh highway restaurant te pawh cheithat leh tih changtlun atum a nih thu a sawi  bawk.

Vawiin Anthurium Festival ni 1-naah hian MZI Reiek, Mizo Cultural Organisation leh zaithiam lar tam tak ten mipui kalkhawm te chu Mizo hnam lam leh zai, rimawi chi hrang hrang ten an awi a. Indian Idol 2009 Sourabhee Debbarma pawh he hunah rawn telin mipui hmaah a hla larte a rawn sa a ni. Mizo hnam incheina chi hrang hrang entirna Fashion Show chu Lucy’s Catalogue-in an buatsaih bawk.

Anthurium Festival hi naktukah neih chhunzawm a ni ang a, Mizoram Chief Minister Pu Lal Thanhawla chu Khuallian a ni dawn a. Entur hmuhnawm tak tak lam leh rimawi lam a awm dawn bakah, eitur intir tui hnai tak tak awmna Food Court pawh buatsaih a ni bawk.