Kumdang ang bawkin Anthurium Festival 2012 ropui thei ang bera hmang turin inbuatsaihna a kal mek zel a. Vawiin khan Tourism Department Secretary Pi B.Sairengpuii hoin a Office Chamber ah Festival atana inbuatsaihna kal mek thlir hoin a kaihhnawih Department hrang hrang hotute nen an thu ho.

Kumin Anthurium Festival hun atan hian Favang hun nuam lai tak nithum chhung September 20 ; ni 21 leh ni 22 hi an ruat a. A nikhat niah hian chhun dar 12 ah hawnna inkhawm hi Secretary Tourism Pi B.Sairengpuii’n a kaihruai ang a; Khuallian His Exelency the Governor of Mizoram Shri Vakkom B.Purushothaman in a hawng ang a. Programme hlimawm tak takin nilengin a zui ang. A nihnihnaah hian chhun dar 11 ah Tourism Director Pu Vabeiha Hlychho in inkhawm a kaihruai ang a, khuallian Pu Lalrinliana Sailo, Hon’ble Health Minister a ni ang. A ni hnuhnung berah hian chhun dar 11 ah bawk Pu H.Zothangliana, Parliamentary Secretary, Tourism in inkhawm a kaihruai ang a khuallian Hon’ble Chief Minister Pu Lal Thanhawla a ni ang.

Heng nithum chhung hian Programme hlimawm tak tak mit leh beng titlai thei tur tam tak a awm ang a. Stall engemaw zat hawngin thil chi hrang hrang lei tur pawh a awm ang a. Ei leh in tur tuihnai tak tak lam theih a ni bawk ang a, Zawlaidi leh Mizo siam intur tuihnai tak tak lei tur a awm bawk dawn a ni.

Hemi ni rawn chhim tur hian State pawnlam mite pawh sawm an ni a, engemawzat rawn tel tura beisei an ni. Zaithiam leh hnam lam chi hrang hrangte nen Programme hlimawm tak hman a ni dawn a ni.