Vawiin khan Kolasib DC Conference Hall-ah Electoral Roll revision chungchang ngaihtuahin District Level Standing Committee an thukhawm a. Draft Electoral Roll siam tawh ennawn leh dan tur leh sawisel tur neite tana hun hawn dan turte sawi zauvin Election Commission of India thupek anga Bru refugee te Tripura transit Camp a awmte tana Epic siam sak dan turte sawi a ni.

Pu Zairemmawia, Addl. DC kaihhruai he meeting ah hian District chhunga AERO pathumte bakah a kaihhnawih Department hotute, NGO leh Media aiawhte an tel a. Ruahman ang chuan Roll Draft Publication hi 1st October 2012 –ah tarchhuah tura tih a ni a. 5th January 2013 –ah final Publication tihchhuah a ni ang. India khua leh tui kum 18 tling tawh phawt te chu Vote an neih theih ngeina turin ruahmanna hi zau tak siam reng a ni a. Amaherawhchu Electoral Roll siam kawngah hian India khua leh tui dik tak an ni em tih leh rolla chuang tura tehfung a kim em tithe chik taka en chunga thil tih a ngai a ni tih AERO te chuan an sawi a. Final Roll tihchhuah hma pawh hian EPIC nei lo emaw tibo a thara siam duh an awm chuan Rs 20 chawiin a thara siamtir theih reng a ni tih meeting-ah hian tarlan a ni a. Draft Electoral Roll tarchhuah rual 1st October atangin thla khat chhung sawisel duh nei te, transfer duh nei etc. tan hun hawn a ni bawk dawn a ni.

Bru refugees, Tripura transit Camp-a awmte, Epic tibote tana Epic thar siamsak tura thiltih dan tur sawiho a ni bawk a. AERO leh official ten hei hi a hmunah kalin Camp 7 ahte a tul angin hna an thawk dawn a, 1st October ah draft roll tichhuakin October thla pum chhung sawiselna hun hawn a ni dawn a ni.