1722/2022-2023

Aizawl 26th August 2022: Vawiin khan Working Committee for Anthurium Festival chu an Chairman leh Joint Secretary, Tourism Department ni bawk Pu V. Lalengmawia hovin a pisaah an thukhawm a. Covid hripui avangin kum 2 chhung virtual-a hman a nih hnuah kuminah Anthurium Festival, 2022 chu Reiek Tourist Resort-ah mipui chhim theih turin hman an rel a. October ni 14 & 15, 2022 chhunga hman tur Anthurium Festival-ah hian Mizo hnamzia phochhuahna - hnam lam, zaithiam/band leh fashion show te bakah intihlimna chi hrang hrang hmandan tur an rel.

Anthurium Festival, 2022 chhung hian Mizo Handloom & Handicrafts, Mizo eisiam chi hrang hrang, Zokhua live demonstration, Adventure activities - ziplining, climbing, shooting, etc bakah Peace Walk/Run te pawh buatsaih tum a ni a. Tourism Department chuan Mizoram mipuite leh Mizoram pawn atanga khualzinte chu Anthurium Festival-ah hlim taka hun rawn hmang turin a sawm a ni.