Tourism Department buatsaih, ni thum chhung awh Anthurium Festival, Reiek Tourist Resort a neih chu vawiin khan a tiak ta a, a kharna inkhawmah Chief Minister Pu Lal Thanhawla chu khuallian a ni.

 Chief Minister Pu lal Thanhawla chuan Anthurium Festival hi anthurium tih tlangthanna tur ringawt a nilova, kan Mizozia hrang hrang pholanna hun anih bakah khualzimite hipna tura huaihawt a ni a ti a. Ram chhung leh ram pawn atanga khualzinmite tlangnelna hun leh Mizo hnahthlak zawng zawngte intawhkhawmna hun a ni a ti.

 Chief Minister chuan tun hi thalaite hun a ni a, he kut pawh hi thalaite inthian thatna ni leh hlimna ni a ni a ti a. Tunlai khawvelah tourism hi industry tha tak a ni a. Amaherawhchu Mizorama industry kan neih ve chu sorkar hi a ni mai a. Chuvangin mipuite tawiawmna leh puihbawmna te a mamawh hle a ni tiin, mitinin theihtawp kan chhuah theuh a tul a ni a ti. Kut chu midangte tan hnawksak lova, hlim taka hmang theuh turin a chah bawk a ni.

 Kut kharna inkhawm kaihruaitu Pu H.Zothangliana, Parliamentary Secretary chuan sorkarin anthurium festival hi vawi 7 a buatsaihna anih thu sawiin, he kut buatsaih thin anih avangin ram pawn thlenga mi te hriat hlawh kan nih phah a ni a ti a. He kut hi Mizo hnam hrang hrang phuarkhawmtu pawimawh tak a ni a ti.

 Anthurium Festival kharna ni ah hian a hma ni hnih ang thoin mal zai, hnam lam, fashion show, hnam incheina entir leh Mizo infiamna hrang hrang entirna te leh air rifles inkahsiakna te neih a ni a. Ei tur chi hrang hrang leh Mizo kutchhuak thil siam dawr te awmin, zufang leh grape wine te pawh lei theihin dawr hawn a ni bawk a. Kut kharna ni ah hian mipui an thahnem hle a, kum dang aiin kut rawn chhim duh, phailam khualzinmi pawh an thahnem hle zawk a ni.