Anthurium Festival 2015 chu Lengpui Mini Sports Complex ah hlawhtling takin ni thum chhung neih a ni a, vawiin khan Tourism Minister Pu John Rotluangliana hovin khar a ni ta.

Tourism Minister chuan tluang taka Anthurium Festival neih a ni leh ta chu lawmawm tiin Kut chhimtute zawng zawng hnenah duhsakna a hlan a. Kut hi tuma ta bik a ni lova, a hmangtute apiang ta a ni tiin intineitu taka hun hmanga, hlim leh nuamti apiang an hlawk a ni, a ti. Reiek atanga Lengpuia sawn a nih chhan sawiin Pu John Rotluangliana chuan a panna kawng a that tawk loh avang leh mipui dawl zo lova an hriat avangin kawng nuam zawk leh hmun zau zawk Lengpui a sawn a ni, a ti.

Kut neih a nih chhung hian kum dang ang bawkin zai, lam leh rimawi dangte thlir leh ngaihthlak tur a awm a. Mizoram chhunga hnam hrang hrangte incheina phochhuah a ni a. Ni thum chhung hian tlai lamah concert buatsaih ziah niin Mizorama Band lar tak takte an zai thin a ni. Kut hman chhung hian kut hmanna chhevel ah ei leh in lamna te, bungrua, thil mawi, hunmawi, mizo thawmhnaw leh incheina chi hrang hrang zawrhna dawr engemawzat leh pangpar zawrhna te siam a ni a, intihhlimna chi hrang hrang buatsaih reng a ni bawk. Kut chhimtu an thahnem hle a, State pawn atanga chhimtu pawh engemawzat an awm a ni.

Anthurium Festival rual hian Bamboo Day hman a ni nghal a. Mizoram Bamboo Day Committee, Environment & Forests bultumin Cultural Club hrang hrangte Cheraw-ah an inel a. Pakhatna Zofa Cultural Club, Chanmari West chuan Rs.50,000 an dawng a; pahnihna Vaivakawn Cultural Club chuan Rs.30,000; pathumna Armed Veng Cultural Club chuan Rs.20,000 an dawng a ni.

Kum tina neih thin Anthurium Festival hi Tourism Department bultuma neih a ni a. Sawrkar laipuiin zinmite hip nan leh tourism industry tihhmasawnna turin State Sawrkarte hnenah Kut hmanna tur sum a pe thin a. He sum atang hian Anthurium Festival pawh hi buatsaih thin a ni.

Anthurium Festival ni thum ni ah hian Environment & Forests Minister Pu Lalrinmawia Ralte, Deputy Speaker Pu R.Lalrinawma, Parliamentary Secretary Pu TT Zothansanga leh Lt.Col.Z.S.Zuala bakah sawrkar mi pawimawh dangte pawh an tel a ni.