Vawiin khan Anthurium Festival Organising Committee chu Tourism Minister Pu John Rotluangliana hovin a pisaah October ni 1 atanga ni 3 chhunga neih tum Anthurium Festival hman dan tur relin an thukhawm.

Pu John Rotluangliana chuan Anthurium Festival neih tur chungchang sawiin he Festival hi mipui ta a ni a, department mal tih lar tumna emaw ni lovin Mizoram hi zin veivakte tana tlawh chakawm taka siam tumna hmanrua a ni, a ti. Reieka neih thin he festival hi kuminah Lengpui Mini Sports Complex-a neih tum niin hei hi festival hluttu an pun zel avangin a hmunhma pan awlsam zawk leh mipui len tam theihna tur zawk nia ngaiin tinzawn a ni, a ti a, a hmun tur hi Sports Council thuneitute dil a ni ang. Festival neih nan hian kum tin Sawrkar Laipui atangin sum dawn thin a nih thu te, State sawrkar sum hman a nih ngai loh thu leh Sawrkar Laipuiin State-te tana tourism hmasawnna tur ruahmanna a siam zinga mi a nih thu Tourism Minister hian a sawi a ni.

Vawiin meeting-ah hian programme chipchiar taka duang tur Working Committee din a ni a. He Working Committee-ah hian Tourism Secretary chu Chairman niin Tourism Director chu Member Secretary a ni. Kuminah hian kum danga tel ngai lo thil thar hmuhnawm tak tak telh tum a ni a. Doordarshan Kendra in Indigenous Sports ni thum buatsaih a tum mek nena kaihkawp dan pawh ngaihven a ni a. He programme hi Anthurium Festival nena kaihkawp theih a nih chuan ni thum chhung DD Sports channel-ah live a pekchhuah a ni dawn a ni. Hei bakah hian kumtina National Bamboo Mission-in Bamboo Day a hman thin pawh Anthurium Festival neih hun chhung hian Bamboo Centre of Excellence, Lengpuiah hman ve nghal tum a ni bawk.

Kumin hian Thalfavang Kut pawh buatsaih leh tum niin December ni 10,11 leh 13 ah neih a nih tur thu sawilan a ni.

Meeting-ah hian Parliamentary Secretary Pu T.T. Zothansanga, Tourism Secretary Pu V.Lalremthanga leh member dangte an tel a ni.