Ni 3 awh tur Anthurium kut, 2006 kum atanga kum tina hman thin chu vawiin khan Reiek ah hman tan a ni a, Inrinni khian a tiak ang. Anthurium Festival 2014 nikhatna ah hian Speaker Pu Hiphei khuallian ah tangin ZIDCO Chairman Pu Lalrobiaka, MLA chu khual zahawm ah hman a ni a. Tourism Minister Pu John Rotluangliana bakah Sawrkar mipawimawh thahnem tak, mikhual ram pawn lam mi leh Mizoram hmun hrang hrang atanga lo kal ten he hun hi an hmang a ni.

Khuallian Pu Hiphei, Speaker chuan kutni leh vangthla te chu hnam rohlu leh hnam ropuina a ni a. Kut kan neih tlem tehlul nen kut pathum kan neih thin zinga pahnih chuan mual min liamsan leh bawk si a, tuna kan hman mek Anthurium Festival leh a dang te hi kan hlut thiam a ngai dawn hle a ni a ti. He kut hi tlai khawhnu a kan siam chawp ni mahse, khualzin hipna hmanrua, hnam thil leh Mizoram dehchhuak zawrh larnana fakna tha tak te a nih pah fawm piah lamah Mizoram a cheng hnam peng hrang hrang te tana inpumkhatna hmanraw tha tak a nih avangin mitin in kan hlut theuh a ngai a ni tiin in mitam zawk kut chhim turin a sawm a ni. Kan ram a chhengchhia a, Industry lian pui pui din nan a remchang lo tih kan chiang a, meikhu chhuah lo sum lakluhna tha ni si, Tourism te hi uar zawka kan kalpui a ngai a. Tourism kaltlang hian kan pangpar neihhlut Anthurium leh a dangte bangah Mizo kutchhuak thil hlu leh mawite hi hlawktham in kan zuar thei dawn bawk a ni Speaker chuan a ti a. Anthurium hralhna ringawt a Rs.4,95,00,000/- lai mai Mizoram in a tel hi hlawhtlinna lian tak a ni tiin nasa zawka rawn pen chhauk turin kuthnathawktu te a chah a ni. Speaker chuan pi leh pute atanga kan kut neih bakah kan hun tawngin a herchhuah pui, Anthurium Kut, Thalfavang kut te, Hnahlan,Biate khuate leh khaw thenkhata mi taima ten an hlawhtlinna zulzuia kut an neih thin te hi kan hlutsak thiam a ngai a ni a ti a. Keimahni in kan kut te kan hlut hmasak loh chuan midang in min rawn hlutsak nghal ngawt thei lo a ni a ti.

Anthurium Ni hmasaber programme hi Tourism Director Pu Vabeiha Hlychho in a kai hruaia, zaithiam mal zai, a huhova zai ngaithla te leh hnam hrang hrang lam te en in kut chhimtu te hi an intihlim a. Heng bakah hian thiam bik thil mipui hmuh a pholanna te pawh neih a ni. Kut hman chhung hian kut hmanna chhevel ah ei leh in tur lamna te, dawr chi hrang hrang bungrua, thil mawi, hunmawi thil, mizo thawmhnaw leh incheina chi hrang hrang zawrhna dawr 40 bawr vel leh pangpar zawrhna te siam a ni a. Lung banga inlawnsiak, sairawkherh inperhsiak leh intihhlimna chi dang dang te a awma, kut chhimtu tam tak chuan he hun hi Reiek Tlang chhip lawn nan remchangah an lo hmang ve mek bawk a ni.

Attachment

  • Loading attachment...