No.2595/2021-2022
Aizawl the 14th October, 2021: Anthurium Festival Programme Committee, October ni 11 a thukhawm chuan kumin October 28 leh 29 zana TV leh internet kaltlanga live-a pekchhuah tur Anthurium Festival 2021 hman dan tur kimchang an duang a. Organising Committee-in a lo rel tawh angin hripui leng vangin he Festival hi mipui nawlpui nen hman rem lo mahse, a duh apiang chhim theih turin TV leh internet kaltlanga pek chhuah a ni dawn a. Festival hi Aizawl Vanapa Hall-ah neih a ni ang.
Pi K.Lalrinzuali, Tourism Secretary hova thukhawm chuan Anthurium Festival zan khatna - October 28 zanah tlai dar 6 atanga dar 8 chhungin darkar hnih chhung tourism advertisement, Anthurium Festival 2018 atanga 2020 thlirletna, mipui aw, Tour Guide Training video, World Tourism Day 2021 video, video montage leh a dang te tarlan ni se, tiin an rel a. Dar 8:00PM atanga dar 10:00PM chhunga live programme hman turah khuallian atan Mizoram Chief Minister sawm ni se, an ti. He programme ah hian kut hawnna, zai, hnam lam, anthurium girls parade, dance choreography te entir a ni ang a. Hun kharna hman a nih hnuah zan dar 10 atanga dar 11 thlengin zaipawl zai te, tourism advertisement te, Tour de Hmuifang leh video clip hrang hrang chhuah chhunzawm a ni ang.
A zanhnihna October 29 zanah chuan 6:00PM atanga 8:00PM thleng mipui aw, fasuar buhchil, jump rope, zan lai thla eng hnuai zai leh a dangte video clip hmanga entir a ni ang a. Live programme hi zan dar 8 atanga dar 9 thleng neih a ni ang. Tourism Minister Pu Robert Romawia Royte chuan he hun hi a hmanpui ang a. Live programme ah hian hnam lam, zai, costume parade leh lam inchawhpawlh, leh thil dang hmuhnawm tak tak thlir tur a awm dawn bawk a ni.
Anthurium Festival chhung hian Anthurium Garden Competition leh Anthurium Flower Arrangement Competition buatsaih ni se tiin an rel a. Vox Populi (mipui aw) chu bazar, sawrkar office, private office leh hmun hrang hrang atanga lakkhawm tum niin tv leh social media kaltlanga pekchhuah a ni dawn bawk a ni.
