No.2594/2021-2022
Aizawl the 14th October, 2021: Tun hnai khan Deputy Commissioner Aizawl District, Women Helpline Mizoram Steering Committee Chairman ni bawk Dr. Lalhriatzuali Ralte, IAS leh Assistant Commissioner, Pu Priyank Kishore, IAS te chuan Women Helpline Mizoram (WHL) Office, Upper Khatla tlawhin office kalphung inrelbawl dan te leh an hnathawh dan te a hmunah an enfiah.

Dr. Lalhriatzuali Ralte leh Pu Priyank Kishore te chuan hmeichhiate dikna chanvo humhalh a, hleilenna hrang hrang te tihtawp a nih theih nan a India ram state hrang hrang a Ministry of Women and Child Development in Women Helpline a din chu lawmawm an tiin Women Helpline Mizoram hna thawh tawh te pawh tha an tih thu an sawi. Hleilenna avanga harsatna tuar te chauh ni lova, hmeichhia rahbi tleu te leh dinhmun harsa tak tak a dingte tana sawrkar in hamthatna (Scheme leh Programme) hrang hrang a duan te hrechiang duh tana call theih reng a an awm hi lawmawm an tih thu an sawi a ni

Dr. Lalhriatzuali Ralte chuan hmeichhiate dikna chanvo humhalh bakah hleilenna chi hrang hrang an tawrh thin te tihtawp nan hian Women Helpline chauh hi a tawk lova. Mimal, chhungkua, khawtlang leh tlawmngai pawl hrang hrang te nen a thawhho na tha neih pawimawh a tih zia a sawi bawk. Hmeichhiate humhalhna dan hrang hrang sawrkar laipuiin a siamte zawm a hleilenna tibo tur hian inchhungkhur a inzirtirna pawimawh a tihzia sawiin, naupan lai atanga inzirtir a pawimawh avangin sikul ah te pawh hetiang lama inzirtirna hi nasa zawka kalpui thin ni se tha a tih thu a sawi bawk. Hmeichhiate zingah harsatna tawk tanpuitu nei lo te, mualpho leh hming hliau hlauh vanga tanpuina zawng a pen chhuak ngam lo an awm fo thin hi pawi a tih thu a sawi bawk.

Women Helpline hi nitin darkar 24 chhung hmeichhia harsatna tawkte tanpui tura in hawng reng an nih avangin zau zawk a mi ten an hriat nan leh hmeichhia ten tangkai zawk a an hman theih nan nasa zawk a awareness kalpui ni se a duh thu Dr. Lalhriatzuali Ralte hian sawiin, Toll free number 181 ah hian man chawi lova engtik lai pawha biak pawh theih reng an nih avangin Mizoram hmun hrang hrang a hmeichhia harsatna tuar ten nasa lehzual in hmang tangkai ngei se a duh thu a sawi a. Google Playstore a 181 WHL Mizoram app pawh hmeichhia zawng zawng ten an te sut kian pui tura hma an lak pui thin avangin an tanpuina mamawhtuten ngaihngam taka rawn pan zel turin a duh thu a sawi bawk.

Women Helpline Mizoram hi kum 2016 April atangin hawn niin, April 2016 – September 2021 thleng khan an call dawn tawh zawng zawng zat hi 9098 a ni a. Harsatna tawk ten Women Helpline an rawn pan chhan tam ber chu inchhungkhura hleilenna chungchang a ni a, an case dawn tawh zawng zawng atanga chhut in 61% lai a tling phak. Anmahni pantute zingah kum 21-40 inkar an tam ber a, 59% an tling a ni. WHL pantute zinga 38% chu pasal neilai an ni a, pawi khawihtu (accused) zingah pawh hian an pasalte an tam ber bawk a ni. Pawikhawihtu zinga a tam zawk te hi zu in mi an ni a, zu vanga buaina pawh a sang hle a ni.