Vawiin khan Pu K.Lal Nghinglova, IAS Tourism Secretary hovin a pisaah kumina Anthurium Festival hman dan tur chungchang ngaihtuahin Mizoram sorkar department hrang hrang hotute, Mizo Cultural Organisation leh Anthurium Growers’ Society aiawhte an thukhawm.
He meeting-ah hian Anthurium Festival chu kuminah pawh Tourist Resort, Reiek-ah ni 19, 20 & 21 September, 2013 chhunga neih leh tura ruahman a ni a, department hrang hrang te hna chanpual bakah he festival neih tura item hrang hrang te leh tul dangte sawiho a ni bawk. He Kut atan hmalak tawh te sawiho a ni bawk. Kumin Anthurium Festival ah hian lam leh zai bakah mipui chanvo kawi kah siak, mizopa sairawkherh inperh siak, in vuak thlak, in suk nawr leh sangha in man siak te a ni.
Tourism Department buatsaih, Anthurium Festival hi khualzin mite hip nan leh kuthnathawktute, a bikin thlai leh pangpar chingtute’n he Kut chhunga an dawr (stall) hawn atanga hlawkna an hmuh theih nan, kum dangah pawh hlawhtling taka buatsaih a lo ni tawh thin a ni.
